ថន លក្ខិណា បង្កប់ភាព អាថ៌កំបាំងក្នុងដំណើរកម្សាន្ត
ភ្នំពេញ៖ តារារាងតូចច្រឡឹងវោហារ ចាក់ទឹកមិនលិច កញ្ញា ថន លក្ខិណា នៅក្នុងឱកាសឈប់សម្រាក រយៈពេល ៣ថ្ងៃ ក្នុងពិធីបុណ្យអុំទូក អកអំបុក សំពះព្រះខែ នេះ គេបានឃើញនាងបង្ហាញរូបថត ជាច្រើនសន្លឹក បង្ហោះជាសាធារណៈ នៅលើបណ្តាញ ទំនាក់ទំនងសង្គម Facebook របស់នាង ដោយនៅក្នុងរូបនោះ បង្ហាញពីភាពសប្បាយ រីករាយ នៅក្នុងដំណើរកម្សាន្ត ជាលក្ខណៈគ្រួសារ ជាមួយម្តាយ ជាទីស្រលាញ់នៅ លើទឹកដីប្រទេសថៃ ។
នាពេលកន្លងមក គេមិនធ្លាប់ឃើញ តារាសម្តែង និងជាពិធីការិនី ប្រចាំស្ថានីយទូរទស្សន៍ ស៊ីធីអិន កញ្ញា ថន លក្ខិណា បង្ហាញវត្តមានម្តាយ នៅក្នុងវិថីសិល្បៈ យកម្តាយធ្វើជាកងការពារ ដូចតារាស្រីដទៃឡើយ។ ជានិច្ចកាល មិនថា នាងទៅណាមកណាទេគេតែងតែ ឃើញនាងបង្ហាញវត្តមាន ជាមួយបងស្រីម្នាក់តែប៉ុណ្ណោះ ។
កាល ដែលនាងមិនយកម្តាយ ដើរតាមជារៀងរាល់ថ្ងៃ ឬក៏បង្ហាញមុខ ជាសាធារណៈដូចតារាដទៃនោះ គឺមកពីនាងស្រឡាញ់ម្តាយ មិនចង់ឲ្យម្តាយហត់នឿយ ត្រូវយួរកាបូប គ្រឿងតុបតែងកាយ ដើរតាមនាងតត្រុកទាំងយប់ ទាំងថ្ងៃ និងមិនចាំបាច់ ធ្វើជាជំនួយការចាំលើកទូរស័ព្ទ ដោះសារជាមួយអ្នកសារព័ត៌មាន នៅពេលមានរឿងមិនល្អ កើតឡើងនោះទេ ។ គេក៏កម្រឃើញ ថន លក្ខិណា នាំម្តាយចេញដើរកម្សាន្ត លំហែកាយ ទាំងក្នុង និងក្រៅប្រទេសច្រើន ដូចតារាដទៃ ព្រោះថា ម្តាយរបស់នាងចាស់ហើយ ត្រូវការពេលវេលាសម្រាក ឲ្យបានច្រើន ទើបល្អ ។
ដោយឡែកនៅពេលថ្មីៗនេះ គេទើបតែឃើញស្រីស្អាតសម្បុរស កញ្ញា ថន លក្ខិណា បង្ហាញរូបថត ដើរលេងកម្សាន្ត ជាមួយម្តាយជាទីស្រឡាញ់ នៅប្រទេសថៃស្ងាត់ៗ ជាច្រើនលើក ច្រើនសារ ព្រោះថារាល់ដំណើរកម្សាន្ត ដែលនាងបង្ហោះ នៅលើបណ្តាញទំនាក់ទំនងសង្គម Facebook នាងតែងសរសេរ នៅលើនោះថា ជាដំណើរកម្សាន្តរបស់នាង និងគ្រួសារនៅលើទឹកដីថៃ ។ការ ដែលនាងឧស្សាហ៍ នាំម្តាយជាទីស្រឡាញ់ ចេញទៅដើរលេង នៅប្រទេសមួយនេះ គេមិនបានដឹងថា បណ្តាលមកពីមូលហេតុ អ្វីឡើយ ព្រោះមើលទៅនាងហាក់ ដូចជាចូលចិត្តទឹកដីនេះ ច្រើនជាងប្រទេសដទៃ ៕ ស.រ/Cambodia News
