តំណាងបក្សប្រឆាំងស៊ីរី ព្រមចូលចរចាតែមានលក្ខខណ្ឌ
ការ វាយប្រហារនៅបន្តមានជានិច្ច និងដោយពុះកញ្ជ្រោលទៀតផង ជាពិសេសនៅភាគខាងជើង ជិតក្រុងអាឡេប។ ដូច្នេះសួរថាតើក្រុមប្រឆាំងនឹងរដ្ឋាភិបាលលោកបាស្ហារ អាល់អាសាទ មើលទៅអាចព្រមព្រៀងចូលនិយាយគ្នាដោយផ្ទាល់ជាមួយរបបក្រុងដាម៉ា ឬព្រមចូលរួមក្នុងសន្និសីទអន្តរជាតិស្តីពីវិបត្តិស៊ីរី នៅទីក្រុងហ្សឺណែវ នាសប្តាហ៍ខាងមុខដែរឬយ៉ាងណា ?! ក្រុមប្រឹក្សាជាតិស៊ីរី ដែលជាតំណាងបក្សប្រឆាំងមួយ បានជួបប្រជុំគ្នារយៈពេលពីរថ្ងៃនៅប្រទេសតួកគី ដើម្បីរៀបចំរដ្ឋាភិបាលបណ្តោះអាសន្ន នៅតាមតំបន់កាប់កាប់ផង និងបន្ទាប់ពីបានពិភាក្សាជាមួយក្រុមប្រដាប់អាវុធ បក្សប្រឆាំងស៊ីរីបានព្រមព្រៀងចូលរួមក្នុងអង្គសន្និសីទ ជាមួយនឹងលក្ខខណ្ឌជាច្រើនចំណុច។
ការ ពិភាក្សាប្រព្រឹត្តទៅយ៉ាងតឹងសរសៃក និងដូចអូសឬស្សីបញ្ច្រាសចុង តែទីបំផុត លទ្ធផលដែលគ្មាននរណាសង្ឃឹមផងនេះ បានប្រសូតចេញដោយត្រដាបត្រដួស និងត្រឹមទទួលយកគោលការណ៍ចរចាជាមួយនឹងរបបលោកបាស្ហារ អាល់អាសាទ។
អាចចាត់ទុកជាជំហានដ៏សំខាន់មួយ ព្រោះតាំងដើមមក ក្រុមប្រឹក្សាជាតិស៊ីរី តំណាងបក្សប្រឆាំងនៅស៊ីរី ធ្លាប់បដិសេធដាច់អហង្ការរាល់គំនិតផ្តួចផ្តើមចរចាជាមួយរដ្ឋាភិបាល ស៊ីរី។
ប៉ុន្តែឧបសគ្គនៅតែមានច្រើនដដែល ព្រោះក្រុមប្រឹក្សានេះបានដាក់លក្ខខណ្ឌ ជាច្រើន ដែលមួយភាគធំរដ្ឋាភិបាលរបស់លោក បាស្ហារ ទំនងជាមិនអាចទទួលបានវិញទេ ៖ សំណូម ចង់ឱ្យរដ្ឋាភិបាលបណ្តោះអាសន្នក្នុងតំបន់កាន់កាប់ដោយពួកឧទ្ទាមឬ យោធា មានអំណាចពេញលេញ។ ព្រមព្រៀងជាគោលការណ៍ឱ្យមានការទម្លាក់លោកបាស្ហារអាល់អាសាទ ពីតំណែង។
ដើម្បីអាចចូលរួមក្នុងសន្និសីទអន្តរជាតិក្រុងហ្សឺណែវ-២ ដែលពុំទាន់កំណត់ថ្ងៃបានផងនោះ ក្រុមយោធាបក្សប្រឆាំងស៊ីរី ចង់ឃើញកម្មវត្ថុនៃជំនួបប្រជុំ មានចែងយ៉ាងច្បាស់លាស់ជាមុន មានបញ្ជាក់ពេលវេលាចរចាច្បាស់លាស់ ព្រមទាំងបង្កើតឱ្យមានស្ថាប័នឯករាជ្យសម្រាប់កាត់ក្តីអ្នក ប្រព្រឹត្តឧក្រិដ្ឋកម្មប្រឆាំងនឹងជាប្រជាជនស៊ីរី។ សម្រាប់ក្រុមយោធានេះ ប្រតិភូបក្សប្រឆាំងស៊ីរី ដែលត្រូវមានវត្តមានក្នុងសន្និសីទ ជាក្រុមតែមួយប្រសូតចេញពីសមាជិកសម្ព័ន្ធបក្សប្រឆាំង និងពីក្រុមប្រឹក្សាជាន់ខ្ពស់យោធា៕ដោយ អៀង សុខម៉ិញ (RFI)