អត្រាស្លាប់ដោយជំងឺមហារីកធ្លាក់ចុះ តែការការពារនៅតែសំខាន់
អត្រាមរណៈបង្កឡើងដោយជំងឺមហារីក នៅសហរដ្ឋអាមេរិកបន្តធ្លាក់ចុះ តាំងពីឆ្នាំ១៩៩០មក ពីរទសវត្សរ៍ជាប់ៗគ្នា។ នេះបើយោងតាមរបាយការណ៍ប្រចាំឆ្នាំរបស់សហព័ន្ធ ដែលចុះផ្សាយនៅថ្ងៃចន្ទទី ០៧មករា ឆ្នាំ២០១៣ ម្សិលមិញ និងដែលមិនភ្លេចគូសបញ្ជាក់ពី ភាពចាំបាច់ នៃពាក្យស្លោក “ការពារ ប្រសើរជាង ព្យាបាល” ទេ ប្រសិនបើចង់ឱ្យអត្រាមរណៈកាន់តែទាប។
គិតចាប់ពីឆ្នាំ២០០០-២០០៩ អត្រាមរណៈបង្កឡើងដោយជំងឺមហារីកបានធ្លាក់ចុះ១,៨% ក្នុងមួយឆ្នាំ ចំពោះបុរស និងកុមារក្រោមអាយុ១៤ឆ្នាំ ចំណែកស្ត្រីវិញអត្រានេះបានធ្លាក់ចុះ ១,៤%។
របាយការណ៍ដែលចេញផ្សាយនៅថ្ងៃ ម្សិលមិញនេះ បានលម្អិតបញ្ជាក់ទៀតថា ក្នុងចំណោមជំងឺមហារីកដែលច្រើនកើតញឹកញាប់លើបុរស ទាំង១៧ មាន១០មុខបានធ្លាក់ចុះ (មហារីកសួត ប្រូស្តាត ពោះវៀនធំ ឈាម ក្រពេញ តម្រងនោម ក្រពះ ឆ្អឹង មាត់ បំពង់អាហារ-បំពង់ខ្យល់)។ ប៉ុន្តែចំពោះបុរសដដែល អត្រាមរណៈបានកើនឡើង ក្នុងករណីមានជំងឺមហារីកស្បែកធ្ងន់ធ្ងរ លំពែង និងមហារីកថ្លើម។
ក្នុងអំឡុងពេល (២០០០-២០០៩)ដូចគ្នា អត្រាមរណៈរបស់ស្ត្រីបង្កឡើងដោយមហារីក ចំនួន១៥បានថយចុះក្នុងចំណោមជំងឺមហារីក១៨ (សួត សុដន់ ពោះវៀនធំ ពោះវៀនទាល់ អូវែ ឈាម ក្រពេញ ខួរក្បាល ឆ្អឹង តម្រងនោម ក្រពះ មាត់ស្បូន ប្លោកនោម បំពង់អាហារ មាត់ បំពង់ក និងប្រមាត់)។ មិនខុសពីបុរស អត្រាមរណៈបង្កដោយជំងឺមហារីកលំពែង ថ្លើម និងស្បូន បានកើនឡើងយ៉ាងខ្លាំងនៅលើអ្នកជំងឺភេទស្រី។
ជាសរុប បើតាមគំនូសបំព្រួញក្នុងរបាយការណ៍នេះ ជំងឺមហារីកជាទូទៅ បានថយចុះ០,៦ ចំពោះបុរស និងនៅថេរចំពោះស្ត្រី តែបានឡើងខ្លាំង(០,៦%)ចំពោះកុមារក្រោមអាយុ១៤ឆ្នាំ។ ហើយបើទោះជាការព្យាបាលប្រយុទ្ធប្រឆាំងនឹងជំងឺមហារីក ហាក់មានការអភិវឌ្ឍន៍ជាវិជ្ជមានយ៉ាងណាក៏ដោយ ក៏ការ “ការពារ” នៅតែជាវិញ្ញាសាដ៏លំបាកមួយដែលក្រុមអ្នកវេជ្ជសាស្ត្រត្រូវប្រឹង ប្រែងខ្លាំងទៀត៕ដោយ អៀង សុខម៉ិញ (RFI)
