ពេជ្រ ច័ន្ទបូរមី លេចមុខជាមួយស្វាមីក្នុងនាមជាលោកជំទាវ
ភ្នំពេញ៖ អតីតតារាសម្តែង ដែលធ្លាប់មានឈ្មោះបោះសម្លេងក្នុងសង្គមសិល្បះខ្មែរ អ្នកនាង ពេជ្រ ច័ន្ទបរមី បានលេចមុខគួឲ្យភ្ញាក់ផ្អើលជាមួយនឹងស្វាមីកាលពីពេលថ្មីៗនេះក្នុងកម្មវិធីធំមួយ ដែលកាលលេចមុខរបស់នាងនាពេលនេះគឺក្នុងនាមជាលោកជំទាវម្នាក់ ។
ទោះយ៉ាងណា ការបង្ហាញវត្តមានរបស់តារាសម្តែងស្រីនៅក្នុងរឿងចៅពស់កេងកងរូបនេះ នាងនៅតែមិនស្វាគមន៍ចំពោះការសាកសួរពីក្រុមអ្នកសារព័ត៌មានឡើយ ដោយសារថា វត្តមានរបស់នាងនាពេលនេះគឺក្នុងនាមជាជំទាវមួយរូបដែលមកជាមួយស្វាមីដែលជាមន្ត្រីមានមុខមាត់ម្នាក់ ហើយសកម្មភាពបែបនេះគឺបានកើតមានជារឿយៗផងដែរសម្រាប់អតីតតារាសម្តែងរូបនេះ បើសូម្បីតែការថតរូបក៍កម្រនាងអនុញ្ញាតឲ្យដែរ។
ក្នុងសម្លៀកបំពាក់រ៉ូបពណ៌ខ្មៅ អ្នកនាង ពេជ្រ ច័ន្ទបរមី បានបណ្តើរគ្នាជាមួយស្វាមីមកចូលរួមក្នុងកម្មវិធីសម្ពោធក្រុមហ៊ុនឆ្នោតមួយកាលពីពេលថ្មីៗនេះ នៅភោជនីយដ្ឋាន តូប៉ាស់ រាជធានីភ្នំពេញ ក្នុងនាមជាភ្ញៀវកិត្តិយស។ ក្នុងពេលនោះក្រៅអំពីការជជែកលែងជាមួយគ្រួសារ អ្នកនាង ពេជ្រ ច័ន្ទបរមីនិងស្វាមី ក៍បានជួបសំណេះសំណាលជាមួយលោក ខៀវ កាញារីទ្ធ រដ្ឋមន្ត្រីក្រសួងព័ត៌មានដែលបានធ្វើជាអធិបតីភាពនៅក្នុងកម្មវិធីនោះ។
គេសង្កេតឃើញថា អ្នកនាង ពេជ្រ ច័ន្ទបរមី នៅតែមានសម្រស់ស្រស់ស្អាតដដែល បើទោះបីជាពេលនេះនាងបានដើរចេញពីវិស័យសិល្បះអស់ជាច្រើនឆ្នាំ ដោយរៀបការសោយសុខនៅលើគំនរមាសប្រាក់ក៏ដោយ។
ពេជ្រ ច័ន្ទបរមី បានបង្ហាញនូវភាពហ៊ឺហាររបស់ខ្លួនក្នុងនាមជាជំទាវម្នាក់ ហើយការលេចមុខជាមួយស្វាមីជាសាធារណះរបស់អតីតតារាសម្តែងរូបនេះ គឺគេកម្រនឹងបានឃើញណាស់ ខណះពេលអ្នកនាងក៍ធ្លាប់បានបង្ហាញវត្តមានម្តងម្កាលនៅក្នុងពិធីជួបជុំអ្នកសិល្បះតែម្នាក់ឯងនោះ។
មានការប្រៀបធៀបថា រវាងអតីតកំពូលតារាស្រីពីរដួងគឺ អ្នកនាងស្រីតូច ចំណាន និងពេជ្រ ច័ន្ទបូរមី ដែលសុទ្ធតែមានស្វាមីជាឯកឧត្ដម និងឧកញ៉ាសំបូរប្រាក់ស្ដុកស្ដម្ភគេអាចកត់សម្គាល់ថា អ្នកនាងពេជ្រ ច័ន្ទបូរមី មានជីវភាពខ្សែជីវិតត្រចង់ត្រចង់ជាង ព្រោះអ្នកនាងអាចរស់នៅក្នុងចំណងបើកចំហជាមួយស្វាមី ដោយពេញមុខ ខុសពីស្រីតូច ចំណាន និងឱក បុរី។ អ្នកនាងកំពុងសោយសុខក្នុងវិឡាតម្លៃជាង៦០ម៉ឺនដុល្លារ នៅម្ដុំភ្នំពេញថ្មី ក្រោយពីសម្រាលបានកូនប្រុសពីរនាក់។
ជាមួយនឹងការបង្ហាញមុខជាថ្មីនេះ គេអាចដឹងយ៉ាងប្រាកដថា អ្នកនាងពេជ្រ ច័ន្ទបូរមី ពិតជាមិនខុសពីរាជនីដែលរស់នៅលើគំនរសុភមង្គលឡើយ ខណៈដែលក្រៅពីមានវិឡាធំស្កឹមស្កៃ មានអង្គរក្សឆ្វេងស្ដាំ អ្នកនាងក៏មានស្វាមី និងមានកូនពីរប្រកបដោយភាពកក់ក្ដៅក្នុងជីវិតទៀតនោះ៕ ស.រ/Cambodia News