តារាចម្រៀងថ្មី ទី នី ផ្តើមអាជីពសិល្បះពីការហាត់ភ្លេង
ភ្នំពេញ៖ ដោយមានមូលដ្ឋានពីការហាត់ភ្លេងតារាចម្រៀងជើងថ្មីសប្បុរស្រអែមមកពីខេត្តព្រៃវែង កញ្ញា ទីនី បានឈានមកចាប់អាជីពជាតារាចម្រៀងនៅក្នុងផលិតកម្មក្រៅស្រុក ដោយក្តីរំពឹងថា និងទទួលបានការគាំទ្រពីយុវវ័យដែលនិយមស្តាប់បទចម្រៀង។
បើទោះបីជាទីតាំងឈរជើងក្នុងផលិតកម្មថ្មីដែលមិនទាន់មានឈ្មោះបោះសម្លេងក៍ដោយតារាចម្រៀងដែលមានវ័យ២០ឆ្នាំរូបនេះនៅតែពុះពារគ្រប់ឧបស័គ្គ ឆ្លងកាត់លើវិថីសិល្បះដែលកំពុងមានការប្រកួតប្រជែងដើម្បីបានឈានឆ្ពោះទៅមុខស្របតាមក្តីស្រមៃតាំងពីកុមារភាព ។
ក្នុងទឹកមុខញញឹម កញ្ញា ទី នី និយាយថា ដំបូងឡើយនាងមិនបានគិតពីឱកាសដែលអាចប្រឡូកនៅក្នុងវិស័យសិល្បះនេះឡើយដោយសារខ្លួនកំពុងតែសិក្សា ប៉ុន្តែសិល្បះគឺជាការស្រឡាញ់របស់នាងតាំងពីតូចក្រូចឆ្មាមកម្លេះ។នាងបញ្ជាក់ថា ឆ្លងកាត់ជីវភាពក្រខ្សត់នាងក៍បានសម្រេចបោះបង់ចោលការសិក្សាចោលពាក់កណ្តាលទី ហើយក៍បានការជួយជ្រោមជ្រែងពីពូរបស់នាងឲ្យបានចូលហាត់នៅសាលាភ្លេងមួយកន្លែងនៅក្នុងរាជធានីភ្នំពេញ។
ឱកាសនៅក្នុងការហាត់ភ្លេងនេះហើយដែលជាស្ពានធ្វើឲ្យរូបនាងមានឱកាសចូលចាប់អាជីពចម្រៀងជំនួសដោយការលែងភ្លេង ខណះពេលដែលទឹកដមសំនៀងរបស់នាងបានទាក់ទាញដល់ម្ចាស់ផលិតកម្មនៅក្នុងស្រុកមួយក្នុងការនាំរូបនាងឲ្យមានឱកាសបង្ហើសំនៀងថតដាក់នៅក្នុងស៊ីឌីជាលើកដំបូង។
ផលិតកម្មដែលកញ្ញា ទី នី កំពុងចាប់អាជីពចម្រៀងនេះមានឈ្មោះថា ផលិតកម្មក្រៅស្រុក ដែលជាផលិតកម្មមួយថ្មីនិងបង្កើតឡើងដោយកូនខ្មែរដែលមានការតាំងតែងទំនុកច្រៀង និងបទភ្លេងដោយខ្លួនឯងពុំមានការលួចចម្លងពីបរទេសឡើយ។
ស៊ីឌីវ៉ុលដំបូងរបស់តារាចម្រៀងសម្បុរសស្រអែមរូបនេះក៏ត្រូវបានទទួលការចាប់អារម្មណ៍ផងដែរពីសំណាក់យុវវ័យដោយក្នុងនោះបទដែលមានការចាប់អារម្មណ៍ជាងគេក្នុងចំណោមបទចម្រៀងទាំង៨បទដែលនាងបានច្រៀងនោះគឺបទវណ្ណះសង្គម។
កញ្ញា ទី នី បញ្ជាក់ថា បទវណ្ណះសង្គម នេះត្រូវបានផលិតឡើងដោយការតាក់តែង និងនិពន្ធបទភ្លេងថ្មីដោយកូនខ្មែរ មិនមានការចម្លងពីបរទេសឡើយ ហើយបទនេះនាងក៍ទទួលបានការសសើរច្រើនពីប្រិយមិត្តអ្នកស្តាប់ជាបន្តបន្ទាប់។
ទន្ទឹមនិងការទទួលបានការគាំទ្រជាបណ្តើរៗតាមរយះបទចម្រៀងនេះ ទី នី ក៍មានឱកាសឡើងបង្ហាញសម្រស់ដាក់ទស្សនិកជនតាមរយះកញ្ចក់ទូរទស្សន៍ផងដែរ ដោយកន្លងមកនាងធ្លាប់បានបង្ហើសំនៀងនៅក្នុងស្ថានីយទូរទស្សន៍CTN នៅក្នុងកម្មវិធីតន្ត្រីថ្ងៃអាទិត្យកាលពីពេលកន្លងទៅ។
ឱកាសទាំងនេះហើយដែលអាចរំពឹងទុកថា តារាចម្រៀងដ៏តូចច្រឡឹងរូបនេះកំពុងតែបាញ់ឆ្ពោះមករកនាវាសិល្បះដ៏ត្រចេះត្រចង់មួយនៅក្នុងសង្គមសិល្បះខ្មែរដែលកំពុងតែមានភាពលូតលាស់ទៅមុខ។
ក្នុងនាមកូនទោលដែលមានឪពុកជាអ្នកចម្រៀងចាប៉ីកញ្ញា ទី នី បានបង្ហាញនូវសុទិដ្ឋិនិយមថា បទចម្រៀងដែលនាងបានច្រៀងនៅក្នុងផលិតកម្មក្រៅស្រុកនិងត្រៀមចែកចាយនៅលើទីផ្សារនាពេលដ៏ខ្លីខាងមុខនេះនឹងទទួលបានការគាំទ្រច្រើនពីប្រិយមិត្តអ្នកស្តាប់ ដោយសំអាងថា ចម្រៀងទាំងអស់នៅក្នុងផលិតកម្មក្រៅស្រុកនេះសុទ្ធសឹងកើតចេញពីស្នាដៃកូនខ្មែរពិតៗ ដោយមិនមានការលួចចម្លងពីស្នាដៃបរទេសណាមួយឡើយ៕ ស.រ/Cambodia News
