ក្រោយពីមានការបង្កៃគ្រឿងផ្ទុះ អភិបាលក្រុង អំពាវនាវឲ្យមហាជនបង្កើនការប្រុងប្រយ័ត្នខ្ពស់
ភ្នំពេញ៖ លោក ប៉ា សុជាតិវង្ស អភិបាលរាជធានីភ្នំពេញ បានចេញសេចក្តីជូនដំណឹង ចុះថ្ងៃទី១៣ ខែកញ្ញា ឆ្នាំ២០១៣ ជូនដល់សាធារណជន ស្តីពី ការរកឃើញគ្រឿងផ្ទុះ និងគ្រាប់កាំភ្លើងទាំងនោះ ហើយអំពាវនាវដល់មហាជន ឲ្យបង្កើនស្មារតីប្រុងប្រយ័ត្នខ្ពស់។
ជាមួយគ្នានោះ លោកអភិបាលរាជធានីភ្នំពេញ ក៏បានបញ្ជាឲ្យប៉ូលិស ប៉េអឹម និងអាជ្ញាធរមូលដ្ឋានគ្រប់លំដាប់ថ្នាក់ ត្រូវខិតខំទប់ស្កាត់ និងបន្តការស្រាវជ្រាវ ដោយយកចិត្តទុកដាក់ ដើម្បីស្វែងរកចាប់ខ្លួនពិរុទ្ធជន មកផ្តន្ទាទោសតាមច្បាប់។
សូមរម្លឹកថា កាលពីព្រឹកថ្ងៃទី១៣ ខែកញ្ញា ឆ្នាំ២០១៣ គេបានប្រទះឃើញគ្រឿងផ្ទុះ និងគ្រាប់កាំភ្លើង នៅមុខរដ្ឋសភា និងសួនច្បារជិតស្ពាននាគ ក្បែរវត្តភ្នំ រាជធានីភ្នំពេញ។ គ្រឿងផ្ទុះ ដាក់ក្នុងប៊ីដុង និងគ្រាប់កាំភ្លើង M79 ចំនួន ៣គ្រាប់ ត្រូវបានក្រុមស៊ីម៉ាក ចុះទៅបំផ្ទុះនៅនឹងកន្លែង និងយកគ្រាប់កាំភ្លើង ចេញរួចរាល់ហើយ កាលពីព្រឹកថ្ងៃសុក្រ។
ពាក់ព័ន្ធនឹង ការប្រទះឃើញការបង្កៃគ្រឿងផ្ទុះ និងគ្រាប់កាំភ្លើងនោះ គណបក្សនយោបាយ និងសកម្មជនសិទ្ធិមនុស្ស យល់ថា ជាការគម្រាមផ្នែកនយោបាយ ចំពេលដែលគណបក្សសង្គ្រោះជាតិ គ្រោងនឹងរៀបចំមហាបាតុកម្ម នៅថ្ងៃអាទិត្យ ទី១៥កញ្ញា៕ Cambodia News
