គ.ជ.ប ផ្តើមដោះស្រាយបណ្តឹងទាស់លទ្ធផលបោះឆ្នោត
ភ្នំពេញ៖ គណៈកម្មាធិការជាតិរៀបចំការបោះឆ្នោត (គជប) នឹងប្រើប្រាស់រយៈពេល៤៨ម៉ោងរបស់ខ្លួន ដើម្បីដោះស្រាយបណ្តឹងតវ៉ាទៅនឹងលទ្ធផលបោះឆ្នោតបណ្តោះអាសន្នទាំងអស់ ចាប់ពីល្ងាចថ្ងៃសុក្រនេះតទៅ។
នៅថ្ងៃទី១៥ ខែសីមានេះ លោក ទេព នីថា អគ្គលេខា គជប បានឲ្យដឹងថា បណ្តឹងដែលគជបនឹងត្រូវដោះស្រាយទាក់ទងនឹងលទ្ធផលបោះឆ្នោតមាន ចំនួន១៧បណ្តឹង ដែលប្តឹងដោយគណបក្សសង្គ្រោះជាតិ។
លោកបន្តថា គ.ជ.ប នឹងផ្តើមដោះស្រាយបណ្តឹងមកពីមណ្ឌលខេត្តក្រចេះរបស់គណបក្សសង្គ្រោះ ជាតិ មុននឹងឈានទៅដោះបណ្តឹងតវ៉ាផ្សេងទៀតរបស់គណបក្សប្រឆាំងដដែល ដែលមកពីខេត្តផ្សេងៗទៀត មានដូចជា ខេត្តកណ្តាល និងបាត់ដំបង ជាដើម។
បណ្តឹងដែលគជប នឹងដោះនោះគឺជាបណ្តឹងដែលស្នើឱ្យផ្ទៀងផ្ទាត់លទ្ធផលតែប៉ុណ្ណោះ។ ចំណែកបណ្តឹងស្តីពីបញ្ជីឈ្មោះបោះឆ្នោតនោះមិនត្រូវចាត់ចូលទៅក្នុង បណ្តឹងសម្រាប់ក្រោយការប្រកាសលទ្ធផលបោះឆ្នោតនោះទេ។
ស្របពេលនឹងគណៈកម្មាធិការជាតិរៀបចំការបោះឆ្នោតចាប់ផ្តើមដោះស្រាយ បណ្តឹងនោះ នៅថ្ងៃសុក្រទី១៥នេះ អង្គការអង្កេតការណ៍បោះឆ្នោត ខុមហ្វ្រែល ក៏បានចេញផ្សាយសេចក្តីប្រកាសព័ត៌មានមួយដោយអះអាងថា ភាពមិនប្រក្រតីក្នុងថ្ងៃស ថ្ងៃបោះឆ្នោត និង ការរាប់សន្លឹកឆ្នោតនោះ មានជាង ១ម៉ឺនករណីនៅទូទាំងប្រទេស៕ Cambodia News
