តារាចម្រៀងសាន់ដេ៣ដួងដឹកដៃគ្នាចេញទៅសម្តែងនៅប្រទេសកូរ៉េ
ភ្នំពេញ៖ តារាចម្រៀងប្រុសស្រី៣ដួងនៅក្នុងផលិតកម្មសាន់ដេបានដឹកដៃគ្នាចេញទៅប្រទេសកូរ៉េនៅថ្ងៃទី២ ខែសីហា ឆ្នាំ២០១៣នេះដើម្បីច្រៀងរាំ និងដើរកំសាន្តនៅក្នុងប្រទេសដែលសម្បូរស្រីស្អាតមួយនេះរយះពេលពេញមួយសប្តាហ៍។
តារាចម្រៀងទាំង៣ដួងរបស់ផលិតកម្មសាន់ដេដែលនឹងត្រូវចេញទៅសម្តែងនាពេលនេះមាន លោក អាន គុណកូឡា លោក អ៊ីណូ និងកញ្ញា យូរី ព្រមទាំងវីជេ រស្មីរបស់ស្ថានីយទូរទស្សន៍MyTV ផងដែរ។
តាមការគ្រោងទុកពួកគេត្រូវសម្តែងតែ១ថ្ងៃប៉ុណ្ណោះនៅក្រុងអ៊ុលសានប្រទេសកូរ៉េខាងត្បូង ចំណែកនៅសល់ប៉ុន្មានថ្ងៃទៀតគឺម្ចាស់ស្ព័នស័រនៅទីនោះនិងនាំដើរលេងកំសាន្តនៅទីកន្លែងនានានៅក្នុងប្រទេសដែលមានការរីកចម្រើនខាងផ្នែកបទចម្រៀងមួយនេះ។
មានការកត់សម្គាល់ថា ការចេញសម្តែងនៅក្នុងប្រទេសកូរ៉េរួមគ្នារបស់តារាចម្រៀងអាន គុណកូឡា និងស្រីស្រស់យូរីនាពេលនេះគឺជាឱកាសមួយដ៏ល្អមួយសម្រាប់តារាទាំងពីរដួងនេះក្នុងបន្ថែមភាពផ្អែមល្ហែមរិតចំណងស្នេហ៍ដែលមជ្ឈដ្ឋានខាងក្រៅកំពុងតែដាក់ការសង្ស័យនោះ។
តារាចម្រៀងវ័យក្មេងទាំងពីរដួងដែលជ្រកនៅក្នុងផលិតកម្មតែមួយនេះត្រូវបានគេសង្ស័យថាបានចងសម្ព័ន្ធស្នេហាក្រោយឆាក បន្ទាប់ពីពួកគេទាំងពីរបានសម្តែងកាយវិកាដ៏សាកសមក្នុងបទចម្រៀង សង្សារមួយថ្ងៃ មួយជីវិត។
បើទោះបីជាមានការសង្ស័យយ៉ាងណាក៍ដោយតារាចម្រៀងទាំងពីរដួងនេះតែងតែព្យាយាមលាក់បាំងពីចំណងស្នេហ៍ក្រៅឆាកមួយនេះ ខណះពេលដែលអាជីពចម្រៀងរបស់ពួកគេកំពុងតែមានសន្ទុះនៃការគាំទ្រដែលពាក្យលិចលឺខាងលើនេះអាចជិះឥទ្ធិពលមិនល្អមកលើអាជីពរបស់ពួកគេ។
ប៉ុន្តែសម្រាប់ឱកាសចេញទៅសម្តែងនិងដើរកំសាន្តនៅក្នុងប្រទេសកូរ៉េនាពេលនេះក៍អាចនិយាយបានថា ពួកគេនឹងប្រើពេលវេលាដ៏ល្អមួយនេះបង្កើនភាពស្និតស្នាលបន្ថែមទៀត ព្រោះនៅទីនោះវាអាចឆ្ងាយពីភ្នែកច្រមុះរបស់ទស្សនិកនៅក្នុងស្រុកខ្មែរ។
ទោះយ៉ាងណា ពួកគេបានអះអាងថា នេះគ្រាន់តែជាដំណើរចេញទៅសម្ដែងប៉ុណ្ណោះ មិនមែនជាការឆ្លៀតពេលសាងភាពផ្អែមល្ហែមក្នុងផ្លូវស្នេហាអ្វីឡើយ ព្រោះទំនាក់ទំនងរបស់ពួកគេគឺត្រឹមជាមិត្តរួមការងារប៉ុណ្ណោះ។
ពាក់ព័ន្ធការចេញសម្តែងនៅប្រទេសកូរ៉េនាពេលនេះតារាចម្រៀងវ័យក្មេងសម្រស់ស្រស់សោភាកញ្ញា យូ រី បានឲ្យដឹងថា កញ្ញា និងក្រុមការងារ ត្រូវស្នាក់នៅលើទឹកដីប្រទេសកូរ៉េនេះរយះពេល១សបា្តហ៍។កញ្ញាបញ្ជាក់ថា ការស្នាក់នៅក្នុងប្រទេសដ៏ស៊ីវិល័យមួយនេះពេញមួយសប្តាហ៍មិនមានន័យថា ពួកកញ្ញាត្រូវសម្ដែងពេញមួយសបា្តហ៍នោះទេ ពោលគឺក្រុមការងារទាំងអស់ត្រូវសម្ដែងតែ១ថ្ងៃប៉ុណ្ណោះនៅក្រុងអ៊ុលសាន ចំណែកនៅសល់ប៉ុន្មានថ្ងៃទៀតគឺម្ចាស់ឧបត្ថម្ភនៅទីនោះនាំដើរលេង។
តាមការគ្រោងទុកតារាចម្រៀងទាំង៣ដួងនៅក្នុងផលិតកម្មសាន់ដេ និងមិត្តរួមដំណើរផ្សេងទៀតនឹងត្រូវវិលត្រឡប់មកកាន់ប្រទេសកម្ពុជាវិញនៅថ្ងៃទី ០៩ ខែកក្កដា ឆ្នាំ២០១៣នេះ ៕ ស.រ/Cambodia News
