ប៉ុបពី រងើកភ្លើងស្នេហ៍ចាស់
សារព័ត៌មាន Cambodia News/
ភ្នំ ពេញ(១៥ កុម្ភៈ ២០១៤)៖ កញ្ញា ប៉ុបពី មុននេះ មហាជនបាន ដឹងស្ទើរគ្រប់គ្នា ជុំវិញការប្រកាស បើកបេះដូង រង់ចាំទទួលយកស្នេហ៍ថ្មី ពីបុរសដែលមាន ទឹកចិត្តស្មោះត្រង់ ហើយអាចរួមរស់ស្នេហ៍ពិត ជាមួយគ្នា អស់មួយជីវិត។ ខណៈការប្រកាសនេះ បានប្រហែលទើប៦ខែ ស្រាប់តែធ្លាយដំណឹង ដ៏គួរឲ្យភ្ញាក់ផ្អើលថា ពេលនេះគូស្នេហ៍ចាស់ បានចេញមុខមក ពាំងឃាំងបេះដូង ប៉ុបពី ជាថ្មីឡើងវិញ។
យោងតាមប្រភព ពីអ្នករស់នៅក្បែរខាងតារារូបនេះ បាននិយាយប្រាប់ឲ្យដឹងថា តារាសម្តែងជាប់លំដាប់ថ្នាក់ កញ្ញា ប៉ុបពី ឥឡូវនេះ កំពុងតែត្រូវរ៉ូវគ្នា និងផ្សះផ្សាស្នេហ៍ ជាថ្មីឡើងវិញ ជាមួយបុរសគូស្នេហ៍ចាស់ ដែលធ្លាប់បោះបង់ចោល ទុកបេះដូងនាងឲ្យនៅកំព្រារងាឯកា អស់មួយរយៈពេលធំ។
ប្រភពខាងលើ បានបញ្ចេញមកថា បច្ចុប្បន្នអ្នកទាំងពីរ ហាក់មានភាពស្និទ្ធស្នាល ជាមួយគ្នាដូចដើមឡើងវិញ ក្រោយពេលបុរសម្នាក់នេះ បានរត់មករកសុំក្តីមេត្តា ស្នេហាជាថ្មី ពី កញ្ញា ប៉ុបពី រហូតនាងបាក់ចិត្ត ទន់អារម្មណ៍ យល់ព្រមលើកលែង ទោសកំហុសទាំងឡាយ និងផ្តល់ឱកាសឲ្យ បុរសជាគូស្នេហ៍ចាស់។
តារាសម្តែង និងពិធីការិនី កញ្ញា ប៉ុប ពី បានប្រាប់ឲ្យដឹងថា “ចាស…បង! ជាការពិតណាស់ ឥឡូវភ្លើងស្នេហ៍ ចាស់រវាងខ្ញុំ និងគាត់បានចាប់ផ្តើម ឡើងវិញជាថ្មីម្តងទៀត ព្រោះបុរសគូស្នេហ៍ចាស់ បានវិលត្រឡប់ មករកខ្ញុំ ដើម្បីផ្សះផ្សាគ្នា។
កញ្ញា ប៉ុប ពី បានបញ្ជាក់បន្ថែមថា នាងបានផ្តល់ឱកាសជាថ្មី សម្រាប់បុរសជាគូស្នេហ៍ចាស់ ក្នុង ការមើលថែ ក្តីស្រឡាញ់នេះឡើងវិញ តែនៅត្រង់ថា ទៅថ្ងៃខាងមុខទៀត ក្លាយទៅជាយ៉ាងណានោះ គឺ អាស្រ័យទៅតាម ពេលវេលាជាអ្នកកំណត់។ ចំណែកឯក្តីស្រឡាញ់ ដែលនាងប្រគល់ ទៅលើបុរសគូស្នេហ៍ ចាស់ពេលនេះ គឺទើបតែ៥០ភាគរយតែប៉ុណ្ណោះ៕
