អ្នកភូមិបឹងកក់១៣នាក់ត្រូវបានតុលាការកាត់ទោសឲ្យជាប់គុកម្នាក់២ឆ្នាំកន្លះ
កាលពីថ្ងៃទី២៤ ឧសភា ២០១២ តុលាការរាជធានីភ្នំពេញ បានបើកសវនាការផ្ដន្ទាទោសស្ត្រីអ្នកភូមិបឹងកក់ ១៣នាក់ឲ្យជាប់ពន្ធនាគារម្នាក់ ២ឆ្នាំកន្លះពីបទកាន់កាប់ដោយខុសច្បាប់លើអចលនវត្ថុរបស់នីតិបុគ្គលសាធារណៈ និងបទប្រឆាំងអាជ្ញាធរសាធារណៈដោយមានស្ថានទម្ងន់ទោស។
តាមរបាយការណ៍របស់សមាគមសិទ្ធិមនុស្សអាដហុក បានសរសេរថា នៅក្នុងរយៈពេល ៥ខែ ដើមឆ្នាំ២០១២ គិតពីខែមករា ដល់ខែឧសភា នេះ មានអំពើហិង្សាប្រើអាវុធយ៉ាងតិច ៥ករណី និងធ្វើឲ្យមនុស្សស្លាប់ដោយការបាញ់ប្រហារចំនួន ៣នាក់ ព្រមទាំងចាប់ខ្លួនមនុស្សប្រមាណ ២៤នាក់ ក្នុងនោះមានប្រជាពលរដ្ឋនៅក្នុងខែត្រក្រចេះ និងករណីចាប់ខ្លួនអ្នកភូមិបឹងកក់ និងព្រះសង្ឃ លួន សុវ៉ាត។
អង្គការសង្គមស៊ីវិលមានការភ្ញាក់ផ្អើលជាខ្លាំងចំពោះរដ្ឋាភិបាល ដែលមិនអាចគ្រប់គ្រងលើកងកម្លាំងយោធា និងប៉ូលិស ដែលប្រើហិង្សាបង្ក្រាបអ្នកតវ៉ា ដើម្បីការពារប្រយោជន៍ក្រុមហ៊ុនឯកជននោះ។ ហើយបញ្ហាទាំងនេះរដ្ឋាភិបាលកម្ពុជា កំពុងតែបង្ហាញគំរូអាក្រក់ដល់ប្រទេសជាសមាជិកនៅក្នុងតំបន់អាស៊ាន ក្នុងឋានៈខ្លួនជាប្រធានសមាគមអាស៊ាន៕
