ក្រសួងមហាផ្ទៃ ត្រៀមកម្លាំងរក្សាសណ្តាប់ធ្នាប់សម្រាប់ការបោះឆ្នោត
ភ្នំពេញ៖ កាលពីថ្ងៃទី២៥ ខែកក្កដា មន្ត្រីជាន់ខ្ពស់នៃអគ្គស្នងការដ្ឋាននគរបាលជាតិឲ្យដឹងថា ក្រសួងមហាផ្ទៃ នឹងដាក់កម្លាំងការពារសណ្តាប់ធ្នាប់ ប្រសិនបើមានក្រុមតវ៉ាប្រឆាំងនឹងលទ្ធផលនៃការបោះ ឆ្នោត នៅថ្ងៃទី២៨ ខែកក្កដា ខាងមុខនេះ។
អ្នកនាំពាក្យនៃអគ្គស្នងការដ្ឋាននគរបាលជាតិ លោក គៀត ច័ន្ទថារិទ្ធ បានលើកឡើងថា ដើម្បីការពារសណ្តាប់ធ្នាប់ នៅពេលជិតបោះឆ្នោត និងថ្ងៃបោះឆ្នោតក្នុងសប្តាហ៍នេះ ក្រសួងបានត្រៀមកម្លាំងការពារច្រើននាក់ ដាក់តាមការិយាល័យបោះឆ្នោត ។
លោក គៀត ច័ន្ទថារិទ្ធ បន្តថា ក្រោយការបោះឆ្នោត អាចនឹងមានការតវ៉ា មិនទទួលស្គាល់លទ្ធផលបោះឆ្នោត តែនេះជាសិទ្ធិរបស់អ្នកតវ៉ា ហើយកម្លាំងសមត្ថកិច្ច នឹងត្រូវដាក់ត្រៀមដើម្បីការពារ ដើម្បីការពារបញ្ហា និងភាពមិនប្រក្រតីទាំងឡាយ ដែលអាចនឹងកើតឡើងដោយមិនបានគ្រោងទុកមុន៕ Cambodia News