ក្រុមប្រឹក្សាឃ្លាំមើលកម្ពុជាថ្កោលទោសចំពោះទង្វើដែលបង្កឲ្យកុមារីម្នាក់ស្លាប់
នៅថ្ងៃទី១៧ ឧសភា ២០១២ ក្រុមប្រឹក្សាឃ្លាំមើលកម្ពុជា បានចេញសេចក្ដីថ្លែងការណ៍ ថ្កោលទោស ចំពោះទង្វើរបស់អាជ្ញាធរ និងកងកម្លាំងប្រដាប់អាវុធ ដែលបានធ្វើការបង្ក្រាប និងបាញ់ទៅលើប្រជាពលរដ្ឋខ្មែរ បណ្ដាលឲ្យកុមារីម្នាក់ស្លាប់ និងរងរបួសច្រើននាក់ កាលពីថ្ងៃទី១៦ ឧសភា ២០១២ ស្ថិតក្នុងភូមិសាស្ត្រឃុំកំពង់ដំរី ស្រុកឆ្លូង ខេត្តក្រចេះ។
សេចក្ដីថ្លែងការណ៍បានបង្ហាញថា ក្រុមប្រឹក្សាឃ្លាំមើលកម្ពុជា កត់សម្គាល់ឃើញថា រាល់ទង្វើរបស់កងកម្លាំងប្រដាប់អាវុធ ក្រោមការដឹកនាំពីមន្ត្រីរាជរដ្ឋាភិបាល បាញ់បង្ក្រាបលើប្រជាពលរដ្ឋ ដែលបានធ្វើការទាមទារពីក្រុមហ៊ុនដែលបានរំលោភយកដីធ្លីរបស់ពួកគាត់ កាន់តែមានភាពសាហាវឃោរឃៅ និងព្រៃផ្សៃឡើង។
ក្រុមប្រឹក្សាឃ្លាំមើលកម្ពុជា យល់ឃើញថា ការប្រើពាក្យតំបន់អបគមន៍ គឺជាលេសដើម្បីធ្វើការបាញ់បង្ក្រាបមកលើប្រជាពលរដ្ឋ ឲ្យបញ្ឈប់ការតវ៉ារឿងវិវាទដីធ្លី និងជាសារថ្មីមួយផ្ញើជូនប្រជាពលរដ្ឋនៅតំបន់ផ្សេងៗទៀត ដែលមានវិវាទដីធ្លី ឱ្យឈប់តវ៉ា។
សេចក្ដីថ្លែងការណ៍របស់ក្រុមប្រឹក្សាឃ្លាំមើលកម្ពុជា សូមឲ្យប្រជាពលរដ្ឋខ្មែរទាំងអស់ ចាប់ផ្ដើមគិត និងអញ្ជើញអ្នកដឹកនាំរដ្ឋាភិបាល ឱ្យឈប់សម្រាកតាមការបោះឆ្នោត ដើម្បីបញ្ចប់ការរំលោភយកដីធ្លី ពីសំណាក់អ្នកមានអំណាច មានលុយ ក្រុមហ៊ុន និងការបាញ់បង្ក្រាបយ៉ាងព្រៃផ្សៃ មកលើប្រជាពលរដ្ឋខ្មែរយើងបន្តទៀត៕
