នៅថ្ងៃទី១៦ ដល់១៩ អាចនឹងមានភ្លៀងធ្លាក់ជាប់ៗគ្នា
យោងតាមសេចក្ដីជូនដំណឹង របស់ក្រសួងធនធានទឹក និងឧតុនិយម ចេញផ្សាយថ្ងៃទី១៦ ឧសភា ២០១២ បានឲ្យដឹងថា នៅពេលរសៀល គឺមានអាកាសធាតុអួអាប់ និងពេលយប់បង្កជាភ្លៀង ផ្គររន្ទះ និងខ្យល់បោកបក់ខ្លាំង នៅរាជធានី និងបណ្ដាខេត្តមួយចំនួន ក្នុងរយៈពេល៤ថ្ងៃ ចាប់ពី ថ្ងៃទី១៦ ដល់១៩ ឧសភា ២០១២។
សេចក្ដីជូនដំណឹងនេះ ធ្វើឡើងបន្ទាប់ពីក្រសួងបានសង្កេតតាមដានលើស្ថានភាពអាកាសធាតុ កាលពីម៉ោង១ រំលងអធ្រាត្រ ឈានចូលថ្ងៃទី១៦ ឧសភា រួចមកបានរកឃើញថា ជ្រលងសម្ពាធទាប ដែលមានឥទ្ធិពលនៅលើព្រះរាជាណាចក្រកម្ពុជា កាលពីថ្ងៃទី០៥ ឧសភា កន្លងមកនោះនឹងបង្កើនឥទ្ធិពលខ្លួនកាន់តែខ្លាំងក្នុងរយៈពេលបួន ថ្ងៃនេះ។
ចំពោះខេត្តក្រុង ដែលទទួលរងនូវឥទ្ធិពលនេះ មានដូចជា ក្រុងភ្នំពេញ ខេត្តកណ្ដាល កំពង់ស្ពឺ តាកែវ ព្រៃវែង កំពង់ឆ្នាំង ពោធិ៍សាត់ បាត់ដំបង កំពង់ធំ កំពង់ចាម ក្រចេះ កំពត និងខេត្តព្រះសីហនុ។
យោងតាមសេចក្ដីប្រកាសជូនដំណឹងនេះ ក្រសួងធនធានទឹកបានអំពាវនាវដល់អាជ្ញាធរដែនដី និងប្រជាពលរដ្ឋ ឲ្យបង្កើនការយកចិត្តទុកដាក់ ប្រុងប្រយ័ត្នខ្ពស់ ដើម្បីចៀសវាងនូវគ្រោះថ្នាក់ផ្សេងៗ ដែលកើតមានជាយថាហេតុ៕
