ប៉ូលិស នឹងចាត់វិធានការ ការពារសន្តិសុខ លោកសម រង្ស៊ី
Cambodia News/
ភ្នំពេញ៖ មន្ត្រីជាន់ខ្ពស់រដ្ឋាភិបាលបាននិយាយថា នឹងចាត់វិធានការដើម្បីការពារសន្តិសុខ លោក សម រង្ស៊ី នៅពេលដែលលោក វិលត្រឡប់មកកម្ពុជានៅថ្ងៃសុក្រ ការពារនេះ ព្រោះខ្លាចភាគីទីបី ធ្វើអ្វីមួយហើយ ពេលនោះគេអាចនឹងទម្លាក់ការទទួលខុសត្រូវមកលើរដ្ឋាភិបាល។
លោក ខៀវ សុភក្ត្រ អ្នកនាំពាក្យក្រសួងមហាផ្ទៃ បាននិយាយថា «យើងបានទទួលពាក្យសុំកិច្ចការពារសន្តិសុខ ចំពោះរូបលោក សម រង្ស៊ី នៅពេលគាត់វិលត្រឡប់មកវិញ ហើយយើងនឹងចាត់វិធានការតាមប្រក្រតីដើម្បីការពារសន្តិសុខរបស់គាត់»។
លោក សម រង្ស៊ី និងគណបក្សសង្គ្រោះជាតិរបស់គាត់ កំពុងតែប្រឹងប្រមូលមនុស្ស អោយបាន ៤ ម៉ឺននាក់សម្រាប់ការទទួលរូបគាត់ នៅពេលវិលត្រឡប់មកវិញ បន្ទាប់ពីការរស់នៅក្រៅប្រទេស ប្រមាណបួនឆ្នាំ ដើម្បីគេចចេញពីការចាប់ខ្លួន ដោយសារលោក មានទោសជាង១០ឆ្នាំ។
លោកអាចវិលត្រឡប់មកកម្ពុជាវិញបាន បន្ទាប់ពីព្រះមហាក្សត្រព្រះរាជទានការលើកលែងទោស កាលពីថ្ងៃទី១២ ខែកក្កដា៕
