សម្ដេចតេជោ ហាមឃាត់មិនឲ្យផឹកស្រា និងប្រើមធ្យោបាយរដ្ឋ ក្នុងថ្ងៃឃោសនាបោះឆ្នោត
សារព័ត៌មាន Cambodia News/
ភ្នំពេញ ៖ ក្នុងឱកាសអញ្ជើញ ជួបសំណេះសំណាល ជាមួយកម្មករ-កម្មការិនីជិត៣ម៉ឺននាក់ មកពីរោងចក្រចំនួន២៥ នៅខេត្តកណ្តាល នាព្រឹកថ្ងៃទី៥ ខែកក្កដា នេះ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសហាមឃាត់ លើការប្រើប្រាស់មធ្យោបាយរដ្ឋ ហាមផឹកស្រា និងលក់ស្រា និងមានចំណុចមួយចំនួនទៀត នៅក្នុងអំឡុងថ្ងៃ ឃោសនាបោះឆ្នោត និងថ្ងៃបោះឆ្នោត ជ្រើសតាំងតំណាងរាស្ត្រ នីតិកាលទី៦ ដែលនឹងកាន់តែខិតជិតចូលមកដល់។
សម្ដេចតេជោបានបញ្ជាក់ថា “បណ្ដាស្ថាប័នរដ្ឋ អ្នកដែលធ្វើការនៅក្នុងរដ្ឋទាំងអស់ ហើយដែលឈរជាតំណាងរាស្ត្រ ឬចូលទៅក្នុងយុទ្ធនាការ ឃោសនាបោះឆ្នោត មិនត្រូវប្រើប្រាស់ នូវទ្រព្យសម្បត្តិរបស់រដ្ឋ ថវិការបស់រដ្ឋ ឬមធ្យោបាយរបស់រដ្ឋ ដើម្បីធ្វើយុទ្ធនាការទេ ។ បញ្ហានេះត្រូវធ្វើឲ្យប្រាកដប្រជា ដើម្បីធានាថា មធ្យោបាយរបស់រដ្ឋ មិនត្រូវបានប្រើប្រាស់ ដោយបក្សនយោបាយទេ ព្រោះវាខុសនឹងច្បាប់ ដែលបានកំណត់ ។
នៅថ្ងៃទី៧ កក្កដា ខាងមុខ ដែលជាថ្ងៃដំបូង នៃយុទ្ធនាការឃោសនាបោះឆ្នោត គណបក្សប្រជាជនកម្ពុជា បានដាក់ពាក្យ សុំធ្វើយុទ្ធនាការ ធំជួបជុំគ្នា នៅកោះពេជ្រ ដោយមានសមាជិកចូលរួម ប្រមាណ៦ម៉ឺននាក់ ហើយហែរក្បូនចេញ ពីកោះពេជ្រ ទៅតាមបណ្តាខណ្ឌនានា ក្នុងរាជធានីភ្នំពេញ ហើយបក្ស៤ទៀត ក៏បានចេញយុទ្ធនាការនៅថ្ងៃនោះដែរ ប៉ុន្តែមានទីតាំងផ្សេងៗគ្នា៕
