បក្សប្រឆាំងថា ការវិលត្រឡប់របស់លោក សម រង្ស៊ី មិនប្រែប្រួលឡើយ
Cambodia News
ភ្នំពេញ៖ នៅថ្ងៃអង្គារនេះ មន្រ្តីអ្នកនាំពាក្យរបស់គណបក្សសង្រ្គោះជាតិ លោក យឹម សុវណ្ណ បានឲ្យដឹង ថា គម្រោងនៃការវិលត្រឡប់មកប្រទេសវិញរបស់លោក សម រង្ស៊ី នឹងមិនប្រែប្រួលឡើយ បើទោះណាជាមួយការគំរាមពីការចាប់ខ្លួនក៏ដោយ។
លោក យឹម សុវណ្ណ បាននិយាយប្រាប់បណ្តាញព័ត៌មានក្នុងស្រុកមួយថា គ្មានបញ្ហាអ្វីដែលនាំឲ្យប្រែប្រួលដល់គម្រោងនៃការវិលត្រឡប់របស់ លោក សម រង្ស៊ី ឡើយ ព្រោះលោកបានប្រកាសប្រាប់ប្រជាពលរដ្ឋខ្មែរហើយថា លោកនឹងប្តូរជីវិតដើម្បីការវិលត្រឡប់ចូលប្រទេសកម្ពុជាវិញ។
សូមបញ្ជាក់ថា បន្ទាប់ពីមានការប្រកាសរបស់លោក សម រង្ស៊ី តាមរយៈក្លីបវីដេអូលើបណ្តាញសង្គម Facebook របស់លោកកាលពីចុងសប្តាហ៍មុន ដោយអះអាងថា លោកនឹងវិលត្រឡប់ចូលប្រទេសកម្ពុជាវិញនៅមុនថ្ងៃបោះឆ្នោតខាងមុខ កាលពីថ្ងៃម្សិលមិញនេះ អ្នកនាំពាក្យប៉ូលិសជាតិក៏បានអះអាងដែរថា សមត្ថកិច្ចនឹងអនុវត្តដីកាចាប់ខ្លួនភ្លាម ប្រសិនបើលោក សម រង្ស៊ី មានវត្តមាននៅក្នុងប្រទេសកម្ពុជា៕