កម្ពុជាប្រារព្ធទិវាសេរីភាពសារព័ត៌មានពិភពលោក
នៅថ្ងៃព្រហស្បតិ៍ ទី០៣ ឧសភា ២០១២ នេះបណ្តាមន្រ្តីរដ្ឋាភិបាល អង្គការសង្គមស៊ីវិល និងអ្នកកាសែតជាតិ និងអន្តរជាតិ បានជួបជុំគ្នាដើម្បីអបអរសាទរទិវាសេរី ភាពសារព័ត៌មានពិភពលោក។
លោក ខៀវ កាញារីទ្ធ រដ្ឋមន្រ្តីក្រសួងព័ត៌មានកម្ពុជា បានថ្លែងនៅក្នុងពិធីដែលរៀបចំដោយអង្គការយូណេស្កូប្រចាំកម្ពុជាថា ការជួបជុំគ្នានេះ គឺដើម្បីរំលឹកដល់ស្នាដៃអ្នកកាសែតដែលបានខិតខំប្រឹងប្រែងបំពេញបេសកកម្មក្នុងការស្វែងរកព័ត៌មានពិតមកផ្សព្វផ្សាយ ហើយមានពេលខ្លះពួកគេត្រូវប្រឈមនឹងគ្រោះថ្នាក់រហូតដល់បាត់បង់ជីវិតផងដែរ។
យ៉ាងណាក៏ដោយលោក បាន គីមូន អគ្គលេខាធិការអង្គការសហប្រជាជាតិ និងលោកស្រី ចចជីវ៉ា បូកាវ៉ា (Georgieva Bokova) បានថ្លែងនៅក្នុងសេចក្តីថ្លែងការណ៍រួមក្នុងឱកាសទិវាសេរីភាព សារព័ត៌មាននេះផងដែរថា សេរីភាពសារព័ត៌មាន គឺជាសេរីភាពមួយយ៉ាងសំខាន់ដែលផ្តល់នូវគ្រឹះនៃសេចក្តីថ្លៃថ្នូរជាមនុស្ស។
ព្រមគ្នានេះមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ ក៏បានបង្ហាញរបាយការណ៍ស្រាវជ្រាវទាក់ទងសិទ្ធិទទួលបានព័ត៌មានផង ដែរ ដែលរកឃើញថា ច្បាប់ស្តីពីសិទ្ធិទទួលបានព័ត៌មានគួរតែចាប់ផ្តើមបង្កើតឡើងនោះ គឺដោយសារតែសិទ្ធិនេះនៅមិនទាន់សម្រេចបានជាផ្លែផ្កានៅឡើយនៅប្រទេសកម្ពុជា៕
