ចោរប្លន់ម៉ូតូ ២នាក់ត្រូវប្រជាពលរដ្ឋវាយស្ទើរស្លាប់
Cambodia News
ភ្នំពេញ ៖ កាលពីវេលាម៉ោង២ និង៣០រំលងអធ្រាត្រឈានចូលថ្ងៃទី២០ ខែមិថុនា ចោរប្លន់២នាក់ក្នុងចំណោមបក្ខពួក៣នាក់ត្រូវប្រជាពលរដ្ឋស្វាគមន៍ ម្នាក់មួយដៃម្នាក់មួយជើងស្ទើរស្លាប់ស្ទើររស់ស្ថិតក្នុងភូមិចម្ការឳឡឹក សង្កាត់កាកាប ខណ្ឌពោធិ៍សែនជ័យ។
ជនរងគ្រោះដែលត្រូវក្រុមចោរប្លន់យកម៉ូតូតែមិនបានសម្រេច មានឈ្មោះសំរិត សារី ភេទប្រុស អាយុ២៦ឆ្នាំ ស្នាក់នៅភូមិ-សង្កាត់កើតហេតុខាងលើ ជិះម៉ូតូម៉ាកស្គូពី ពណ៌ឈាមជ្រូកលាយទឹកប្រាក់ ពាក់ស្លាកលេខភ្នំពេញ 1AU-7474 ។
តាមការឲ្យដឹងពីជនរងគ្រោះបានឲ្យដឹងថា មុនពេលកើតហេតុរូបគេបានជិះម៉ូតូចេញពីផ្ទះមករកទិញបបរហូបនៅមុខ ផ្សារជិនជូរីផ្លាហ្សា ពេលហូបរួចហើយក៏បានវិលត្រឡប់ទៅផ្ទះវិញក៏បានគោះទ្វារអ្នកផ្ទះ ឲ្យបើក ស្រាប់តែពេលនោះក៏មានជនសង្ស័យ៣នាក់ជិះម៉ូតូម៉ាកអាយខុន មិនចាំស្លាកលេខមកឈប់នៅជិះជនរងគ្រោះ ហើយបានយកដំបងសំដៅមកវាយលើជនរងគ្រោះ ។ ពេលនោះជនរងគ្រោះបានចាប់ដំបងជាប់និងបានប្រតាយប្រតប់ជាមួយ ជនសង្ស័យ២នាក់ដែលចុះពីលើម៉ូតូមកវាយខ្លួន ។
ស្របពេលប្រតាយប្រតប់ជនរងគ្រោះបានស្រែកហៅឲ្យអ្នកជិតខាងជួយ ពេលនោះអ្នកជិតខាងឭក៏បានចេញមកជួយធ្វើអន្តរាគមន៍ចាប់ជនសង្ស័យ ទាំង២នាក់វាយយ៉ាងចាស់ដៃដោយមិនឲ្យដៃរួចទេ ធ្វើឲ្យជនសង្ស័យទាំង២នាក់សល់ដង្ហើមចង្រិត ។ ចំណែកជនសង្ស័យដែលនៅលើម៉ូតូអាយខុននោះពេលឃើញប្រជាពលរដ្ឋវាយ បក្ខពួកខ្លួនបានជិះម៉ូតូគេចខ្លួនបាត់ស្រមោល ។
ក្រោយកើតហេតុគេឃើញមានមន្ត្រីនគរបាលមូលដ្ឋានមកធ្វើអន្តរាគមន៍ ចាប់ឃាត់ខ្លួនជនសង្ស័យទាំង២នាក់ខាងលើទៅនគរបាលប៉ុស្តិ៍៕ ដោយ៖ ហេង នាង