ចៅក្រមប្រកាស ផ្តន្ទាទោស យុវតីនិស្សិតពេទ្យ ជាប់គុក ៣ឆ្នាំ តែអនុវត្តន៍ ៣ខែ ១៥ថ្ងៃ
Cambodia News
ភ្នំពេញ៖ នៅរសៀលថ្ងៃទី១២ ខែមិថុនា យុវតីនិស្សិតពេទ្យ ដែលបើកឡានបុកក្មេង ៣ នាក់ ស្លាប់ និងរបួស ៦ នាក់ផ្សេងទៀត នៅមុខក្រសួងមហាផ្ទៃ ត្រូវបានចៅក្រមប្រកាស ផ្តន្ទាទោស ដាក់ពន្ធនាគារ ៣ឆ្នាំ ប៉ុន្តែត្រូវអនុវត្តន៍ក្នុងពន្ធនាគារតែ ៣ ខែ និង ១៥ ថ្ងៃ ហើយពិន័យជាប្រាក់ចំនួន ៦ លានរៀល និងមិនឲ្យបើកបរយាន្តជំនិះគ្រប់ប្រភេទ ចាប់ពីថ្ងៃទីប្រកាសសាលក្រមនេះតទៅ។
សូមបញ្ជាក់ថា និស្សិតពេទ្យ ដែលបង្កគ្រោះថ្នាក់ចរាចរណ៍នោះ ឈ្មោះ គាមពិសិដ្ឋ ណារីតា អាយុ ២៣ឆ្នាំ ជានិស្សិតឆ្នាំទី៦ នៃសាកលវិទ្យាល័យវេជ្ជសាស្ត្រ និងសុខាភិបាល នាង ត្រូវបានតំណាងអយ្យការ សាលាដំបូងរាជធានីភ្នំពេញ ចោទប្រកាន់ពីបទបើកបរបង្កឱ្យមានគ្រោះថ្នាក់ស្លាប់ កុមារប្រុស-ស្រី ៣នាក់ និងរបួស ៦នាក់ផ្សេងទៀត និងបទចោទរបួសដល់អ្នកដទៃ ដោយអចេតនា នៅលើដងមហាវិថីព្រះនរោត្តម មុខក្រសួងមហាផ្ទៃ ស្ថិតនៅក្នុងសង្កាត់ទន្លេបាសាក់ ខណ្ឌចំការមន កាលពីវេលាល្ងាចថ្ងៃទី១ ខែមីនា ឆ្នាំ២០១៣៕