លោកហ៊ុន សែន អំពាវនាវប្រជាពលរដ្ឋកុំឲ្យប្រើប្រាស់ឧបករណ៍នេសាទខុសច្បាប់
នៅក្នុងទិវាមច្ឆាជាតិ កាលពីថ្ងៃទី ១ កក្កដា លោកនាយករដ្ឋមន្រ្តី ហ៊ុន សែន បានប្រកាសបញ្ជាក់សារជាថ្មីម្តងទៀតថា ឡូតិ៍នេសាទទាំងអស់ត្រូវតែលុបចោល គ្មានទៀតឡើយម្ចាស់ឡូតិ៍នេសាទ គឺដែននេសាទរបស់ប្រជានេសាទ និងជារបស់សហគមន៍នេសាទ។
លោក ហ៊ុន សែន បានបញ្ជាក់ថា ដែនទឹកនេសាទ៧៦,៥ភាគរយត្រូវកាន់កាប់ដោយប្រជានេសាទ ប៉ុន្តែដែនទឹក២៣,៥ភាគរយត្រូវរក្សាទុកជាតំបន់អភិរក្សមច្ឆាជាតិ។
ទោះបីដែនទឹកនេសាទមួយភាគធំត្រូវប្រគល់ជូនប្រជានេសាទប៉ុន្តែលោក ហ៊ុន សែន បានសំណូមពរដល់ប្រជាពលរដ្ឋកុំឲ្យប្រើប្រាស់ឧបករណ៍នេសាទខុសច្បាប់ កុំកាប់ព្រៃលិចទឹក និងកុំចាប់ត្រីនៅក្នុងរដូវត្រីពង។
ជាមួយគ្នានោះដែរ លោកក៏បានអំពាវនាវដល់ប្រជាពលរដ្ឋឲ្យរាយការណ៍ពីជនទុច្ចរិត និងមន្ត្រីខិលខូចមួយចំនួនដែលផ្សំគំនិតបំផ្លាញវិស័យជលផល ហើយចំពោះជនខិលខូចអាចប្រឈមនឹងការប្តឹងទៅអង្គភាពប្រឆាំងអំពើពុករលួយ៕
