CCHR រំពឹងថានឹងមានការដោះស្រាយបញ្ហាបឹងកក់ឆាប់ៗ
Cambodia News
ភ្នំពេញ៖ លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា (CCHR) បានថ្លែងនៅក្នុងសេចក្តីថែ្លងការណ៍របស់ខ្លួនថា លោកសូមស្វាគមន៍ ចំពោះឆន្ទៈបើកចំហររបស់លោកអភិបាលរាជធានី ប៉ា សុជាតិវង្ស ចំពោះប្រជាពលរដ្ឋ ដែលកំពុងត្រូវការជំនួយជាបន្ទាន់ពីលោកអភិបាល ហើយសង្ឃឹមថា ការសន្យារបស់លោកអភិបាលចំពោះសហគមន៍នឹងទទួលបានលទ្ធផលយ៉ាងពិតប្រាកដ។
ព្រមគ្នានេះ លោក ក៏បានសូមអំពាវនាវដល់សាលារាជធានីភ្នំពេញ រៀបចំឲ្យមានការប្រជុំជាផ្លូវការជាមួយប្រជាសហគមន៍បឹងកក់នាពេល ឆាប់ៗខាងមុខនេះ ដើម្បីពិភាក្សាលើផែនការជាក់លាក់រកដំណោះស្រាយបញ្ហានោះ ដោយមានការចូលរួមពីអង្គការសង្គមស៊ីវិលផងដែរ។
យ៉ាងណាក៏ ដោយ មជ្ឈមណ្ឌលសិទ្ធិមនុស្សកម្ពុជា (CCHR) ក៏បានជំរុញឲ្យសាលាឧទ្ធរណ៍ដាក់កាលបរិច្ឆេទសវនាការលើករណីអ្នកស្រី យ៉ោម បុប្ផា ឲ្យបានឆាប់បំផុត និងទម្លាក់ការចោទប្រកាន់ទាំងអស់ ចំពោះអ្នកស្រី ព្រមទាំងដោះ លែងអ្នកស្រីភ្លាមៗ ដោយគ្មានលក្ខខណ្ឌ៕