គ្រឿងស្រវឹងជាឃាតកទីពីរ
Cambodia News
ភ្នំពេញ៖ គ្រឿងស្រវឹងត្រូវគេចាត់ទុកថា ជាមូលហេតុទី២ ដែលបង្កគ្រោះថ្នាក់ចរាចរណ៍ និងបណ្ដាលឲ្យខូចខាតសេដ្ឋកិច្ចជាតិដ៏ធ្ងន់ធ្ងរ។ តួលេខបានបង្ហាញថា គ្រោះថ្នាក់ចរាចរណ៍បណ្ដាលមកពីគ្រឿងស្រវឹងមានចំនួន ១៤% ក្នុងនោះបណ្ដាលឲ្យខូចខាតប្រាក់ប្រហែលជា ៤៤លានដុល្លារ ក្នុងចំណោម ៣១០លានដុល្លារ ក្នុង១ឆ្នាំៗ។
នេះជាការលើកឡងរបស់ លោក ឈួន វុន អគ្គលេខាធិការរងគណៈកម្មាធិការជាតិសុវត្ថិភាពចរាចរណ៍ផ្លូវគោក បន្ទាប់ពីបិទវគ្គបណ្ដុះបណ្ដាលអ្នកសារព័ត៌មានស្ដីពី សុវត្ថិភាពចរាចរណ៍ និងបើកបរពេលស្រវឹង នៅមន្ទីរពេទ្យកុមារជាតិ កាលពីថ្ងៃទី០៦ ឧសភា ២០១៣ គ្រឿងស្រវឹងគឺជាមូលហេតុទី២ ខណៈមូលហេតុទី១ ដែលបណ្ដាលឲ្យកើតមានគ្រោះថ្នាក់ចរាចរណ៍ គឺការបើកបរហួសល្បឿនកំណត់។
លោក យ៉ង់ គឹមអ៊េង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្ដិភាព មានប្រាសាសន៍ថា គ្រឿងស្រវឹងបានធ្វើឲ្យយុវវ័យឈានដល់ការសេពគ្រឿងញៀន កើតមានអំពើឧក្រិដ្ឋកម្ម ជាដើម។ លោកបន្ដទៀតថា ដើម្បីដោះស្រាយបញ្ហាទាំងអស់នេះ គឺរាជរដ្ឋាភិបាលត្រូវរឹតបន្តឹងការផ្សព្វផ្សាយពាណិជ្ជកម្មគ្រឿង ស្រវឹង និងត្រូវមានគោលនយោបាយគ្រឿងស្រវឹងជាដើម៕
