ខេមរះ សិរីមន្ត សម្ញែងរថយន្តថ្មីតម្លៃជិត១០ម៉ឺនដុល្លារ
Cambodia News
ភ្នំពេញ៖ ក្នុងពេលដែលរថយន្តម៉ាកTundra តម្លៃជាង៦ម៉ឺនដុល្លាររបស់កំពូលតារាចម្រៀងប្រចាំផលិតកម្មសាន់ដេ លោក ខេមរះ សិរីមន្ត បានរងការខូចខាតស្ទើរទាំងស្រុកក្រោយពេលជួបឧប្បទ្ទហេតុគ្រោះថ្នាក់ចរាចរណ៍កាលពីថ្ងៃទី៧ ខែមីនា ឆ្នាំ២០១៣ នៅតាមបណ្តោយផ្លូវជាតិលេខ៤នោះរួចមក ស្រាប់តែតារាចម្រៀងរូបនេះបានសម្ញែងរថយន្តថ្មីមួយគ្រឿងទៀតម៉ាកRange Rover ស៊េរីឆ្នាំ២០០៨ ដែលមានតម្លៃជាងម៉ឺនដុល្លារយ៉ាងសង្ហា ខណះពេលដែលសំណងដែលបានទាមទារមិនទាន់បានផងនោះ។
ការបង្ហាញរថយន្តថ្មីដែលគួឲ្យភ្ញាក់ផ្អើលនេះត្រូវបានគេមើលឃើញក្នុងពេលដែលតារាចម្រៀងរូបនេះបានធ្វើដំណើររួមជាមួយឪពុករបស់លោកចូលរួមក្នុងសន្និសីទសារព័ត៌មានដែលបានធ្វើឡើងនៅក្នុងសមាគមសិល្បះករខ្មែរកាលពីពេលថ្មីៗនេះ ក្នុងគោលបំណងឲ្យក្រុមហ៊ុនSK ពន្លឿនសំណងដល់ភាគីជនរងគ្រោះ។
ខណះពេលដែលសំណងពីភាគីខាងបង្កនៅមិនទាន់បានមួយរៀលផងនោះស្រាប់តារាចម្រៀងរូបនេះបានបង្ហាញនូវរថយន្តថ្មីស្រឡាងមួយផ្សេងទៀត ដែលធ្វើឲ្យគេគ្រប់គ្នាយល់ថា សិរីមន្ត គឺជាតារាចម្រៀងសេដ្ឋីវ័យក្មេង បន្ទាប់ពីមានផ្ទះតម្លៃជាង៤០ម៉ឺនដុល្លារហើយនោះ លោកក៍មានរងយន្តសណ្តោងដែលមានតម្លៃជាង៦ម៉ឺនដុល្លារថែមទៀតផង។ ដោយឡែកការបង្ហាញរថយន្តដ៏ទំនើប និងទាន់សម័យមួយថ្មីនេះក៍កាន់តែបង្ហាញឲ្យកាន់តែច្បាស់ថា តារាចម្រៀងរូបនេះនៅតែមានប្រាក់កាសជាប់ខ្លួនរាប់ស៊ិបម៉ឺនដុល្លារ បើទោះបីជាលោកបានជួបគ្រោះអាក្រក់ខាតបង់ទ្រព្យសម្បត្តិរាប់សិបម៉ឺនដុល្លារនិងមិនទាន់ទទួលបានសំណងមកវិញក៍ដោយ ។
តារាចម្រៀងដែលមានអាយុថ្លៃដែលអាចគេចផុតពីគ្រោះចរាចរណ៍ដ៏រន្ធត់រូបនេះបានអះអាងថា រថយន្តដែលលោកបានជិះនាពេលនេះគឺជារថយន្តរបស់លោកពិតមែន ដែលលោកបានទិញវារយះពេលមួយសប្តាហ៍កន្លងមកហើយ។លោកបញ្ជាក់ថា មូលហេតុដែលលោកសម្រេចចិត្តទិញរថយន្តថ្មីនាពេលនេះគឺដោយសារតែលោកគិតថា រថយន្តចាស់របស់លោកនោះបានរងការខូតខាតស្ទើរទាំងស្រុកទៅហើយ មិនអាចយកមកប្រើការបន្តទៀតនោះទេ។ ម្យ៉ាងទៀតលោកត្រូវមានការចាំបាច់ក្នុងការប្រើប្រាស់រថយន្តក្នុងការធ្វើដំណើរទៅសម្តែងនៅតាមកន្លែងផ្សេងៗនៅក្រោយពិធីចូលឆ្នាំខ្មែររួច។
លោកបន្ថែមថា ការចំណាយប្រាក់យកមកទិញរថយន្តមួយនេះគឺលោកបានប្រមូលប្រាក់ដែលបានសន្សំពីអាជីពសិល្បះនាពេលកន្លងមកដែលលោកទុកប្រាក់ទាំងនោះសម្រាប់បើកមុខជំនួញ។ ប៉ុន្តែដោយសារតែលោកមើលឃើញពីស្ថានភាពលំបាកក្នុងការធ្វើដំណើរនោះលោកក៍សម្រេចចិត្តយកប្រាក់ទាំងនោះយកមកទិញតែម្តង។ លោកបញ្ជាក់អះអាងថា មូលហេតុដែលលោកសម្រេចទិញរថយន្តម៉ាកនេះដោយសារតែវាជាប្រភេទរថយន្តដែលទាន់សម័យ និងកំពុងពេញនិយមសម្រាប់អ្នកប្រើប្រាស់។
ទោះជាយ៉ាងតារាចម្រៀងរូបនេះមិនបានបញ្ជាក់ពីតម្លៃរបស់រថយន្តថ្មីនេះឡើយ ប៉ុន្តែបើផ្អែកតាមតម្លៃទីផ្សារបច្ចុប្បន្នរថយន្តប្រភេទនេះមានតម្លៃប្រហាក់ប្រហែលនឹងជិត១០ម៉ឺនដុល្លារឬក៍អាចលើសពីនេះ។
ពាក់ព័ន្ធទៅនឹងសំណងមិនទាន់បាន ខណះពេលដែលសិរីមន្ត បង្ហាញរថយន្តថ្មីស្រឡាងបែបនេះអាចនិងមានការប៉ះពាល់ដល់អារម្មណ៍ជនរងគ្រោះដ៏ទៃទៀតឬយ៉ាងណានោះ តារាចម្រៀងប្រចាំផលិតកម្មសាន់ដេរូបនេះបានបញ្ជាក់ថា មុននឹងលោកសម្រេចចិត្តទិញរថយន្តថ្មីនាពេលនេះគឺលោកបានយល់ដឹងពីទឹកចិត្តរបស់ពួកគាត់ទាំងអស់ច្បាស់លាស់ ដែលពួកគាត់ទាំងនោះមានការយល់ដឹង និងដឹងច្បាស់ពីផលលំបាករបស់លោក។ ម្យ៉ាងទៀតពួកគាត់ក៍បានជូនពរដល់រូបលោកផងដែរ ដែលកក្តាទាំងនេះជាមូលហេតុធ្វើឲ្យលោកមិនមានការព្រួយបារម្ភក្នុងការប៉ះទង្គិចទឹកចិត្តរបស់ពួកគាត់ឡើយ ក្នុងពេលដែលលោកបានបង្ហាញរថយន្តថ្មី ខណះដែលសំណងមិនទាន់បាននៅឡើយនោះ។
ការបង្ហាញរថយន្តថ្មីរបស់តារាចម្រៀងខេមរះ សិរីមន្ត នាពេលនេះស្របពេលដែលតារាចម្រៀងរូបនេះនិងបង្ហាញវត្តមានជាថ្មីក្នុងកម្មវិធីប្រគុំតន្ត្រីដ៏ធំមួយដែលរៀបចំឡើងដោយសណ្ឋាគារណាហ្គាវើល ដើម្បីអបអរសាទរបុណ្យចូលឆ្នាំប្រពៃណីខ្មែរ ព្រមទាំងកម្មវិធីជាច្រើនទៀតបន្ទាប់ពីបុណ្យចូលឆ្នាំរួច។
សិរីមន្ត បញ្ជាក់ថា មូលហេតុដែលោកចេញមុខច្រៀងជាថ្មីមុនការកំណត់នាពេលនេះគឺដោយសារតែលោកបានសិក្សាពីខ្លួនឯងយ៉ាងច្បាស់ថាអាចច្រៀងបានឡើងវិញ បន្ទាប់ពីមានការភិតភ័យព្រលឹងចុងសក់ក្រោយពីជួបហេតុការដ៏អាក្រក់នាពេលកន្លងមកនោះ៕ ស.រ