បុរសម្នាក់ខណៈកំពុងជិះម៉ូតូត្រូវរថយន្តបុកបណ្តាលឲ្យរងរបួសធ្ងន់
Cambodia News
ភ្នំពេញ៖ កាលពីវេលាម៉ោង៧និង៤០នាទី ព្រឹកថ្ងៃទី១៩ ខែមេសា បុរសម្នាក់ខណៈកំពុងជិះម៉ូតូត្រូវរថយន្តមួយគ្រឿង បុកពេញទំហឹងស្ថិតនៅតាមបណ្តោយផ្លូវជាតិលេខ ៤ភូមិព្រៃបឹង សង្កាត់កន្ទោក ខណ្ឌពោធិ៍សែនជ័យ បណ្តាលឲ្យរងរបួសធ្ងន់ធ្ងរ ត្រូវបានរថយន្តសង្គ្រោះរបស់ អង្គភាព៧១១ កងពលតូចលេខ៧០ ដឹកយកទៅកាន់មន្ទីរពេទ្យកាល់ម៉ែត ដើម្បីជួយសង្គ្រោះ។
ប្រភពព័ត៌មានពីនគរបាល បានឲ្យដឹងថា ជនរងគ្រោះមានឈ្មោះ កែវ ប៊ុនថេក ភេទប្រុសអាយុ ៤៦ឆ្នាំ មានទីលំនៅ ភូមិត្រពាំងច្រនាង ឃុំពើក ស្រុកអង្គស្នួល ខេត្តកណ្ដាល មានស្រុកកំណើតនៅភូមិត្នោតជ្រុំ ស្រុកក្រគរខេត្តពោធិ៍សាត់ ជិះម៉ូតូមួយគ្រឿងម៉ាកវ៉េវ ពណ៌ក្រហម ពាក់ស្លាកលេខ ភ្នំពេញ1N 6444 រងការខូចខាតផ្នែកខាងមុខបន្ដិចបន្ដួច។ ចំណែកឯរថយន្ដបង្កម៉ាកហ៊ីយ៉ាន់ដាយ ពណ៍ស ពាក់ស្លាកលេខភ្នំពេញ 2M 4029 ក្រោយកើតហេតុអ្នកបើកបរបានរត់គេចខ្លួនបាត់។
មុនពេលកើតហេតុ គេឃើញរថយន្តបើកបរ ក្នុងទិសដៅពីកើតទៅលិច ចំណែកឯម៉ូតូវិញជិះម្នាក់ឯង បើកបរ ក្នុងទិសដៅពីលិចទៅកើត លុះដល់ចំណុចកើតហេតុ រថយន្តក៏បត់ឆ្លងផ្លូវក្នុងទិសដៅ ពីជើងទៅត្បូង ហើយក៏បានជ្រុលចង្កូតទៅបុកម៉ូតូ យ៉ាងពេញទំហឹង បណ្តាលឲ្យដួលបោកទាំងម៉ូតូ ទាំងមនុស្ស ទៅនឹងថ្នល់រងរបួស ជើងម្ខាងខាងឆ្វេងយ៉ាងធ្ងន់ធ្ងរ ចំណែកអ្នកបើកបររថយន្តវិញ ក៏បានចាកចេញពីរថយន្ត រួចហើយគេចខ្លួនទៅបាត់ភ្លាមៗ។
បច្ចុប្បន្នម៉ូតូ និងរថយន្ត ត្រូវបាននគរបាលចរាចរ យកទៅរក្សាទុកនៅអធិការដ្ឋាន ដើម្បីរង់ចាំភាគីទាំង សងខាង ចូលខ្លួនទៅដោះស្រាយជាក្រោយ៕ ហេង នាង
