អ្នកនាំពាក្យរាជរដ្ឋាភិបាលកម្ពុជា ប្រតិកម្មចំពោះអត្តបទរបស់វិទ្យុអាស៊ីសេរី
Cambodia News
ភ្នំពេញ៖ អ្នកនាំពាក្យ រាជរដ្ឋាភិបាលកម្ពុជា លោក ផៃ ស៊ីផាន បានប្រតិកម្មខ្លាំងៗចំពោះវិទ្យុអាស៊ីសេរី ដែលបានផ្សាយអត្ថបទនិយាយអំពីការបាត់បង់ទឹកដីនៅតាមព្រំដែនប្រទេស ថៃ ដែលប្រតិកម្មនេះត្រូវបានបញ្ចេញនៅក្នុងសន្និសីទកាសែតនៅព្រឹកថ្ងៃ ព្រហស្បតិ៍ នៅក្នុងសន្និសីទកាសែតនៅទីស្តីការគណៈរដ្ឋមន្ត្រី ដោយមានការចូលរួមពីមន្ត្រីជាន់ខ្ពស់រដ្ឋាភិបាលជាច្រើនរូបទៀតផង។
លោក ផៃ ស៊ីផានបានបញ្ជាក់បន្ថែមថា រដ្ឋាភិបាលកម្ពុជានឹងអាចចាត់វិធានការតាមផ្លូវច្បាប់ ចំពោះវិទ្យុអាស៊ីសេរី។ មន្ត្រីជាន់ខ្ពស់រដ្ឋាភិបាលរូបនេះបានបញ្ជាក់ផងដែរថា ព័ត៌មានដែលត្រូវបានផ្សព្វផ្សាយនេះ ជាព័ត៌មានភូតកុហកទាំងស្រុង។
អ្នកនាំពាក្យក្រសួងការពារជាតិលោកឧត្តមសេនីយឯក ឈុំ សុជាតិបានបញ្ជាក់ថា កម្ពុជាមិនបានបាត់បង់ទឹកដីរបស់ខ្លួនឡើយ «សូម្បីមួយមីល្លីម៉ែត្រ»។ ចំពោះមន្ត្រីជាន់ខ្ពស់យោធារូបនេះ ព័ត៌មានរបស់វិទ្យុអាស៊ីសេរីអាចនាំអោយប៉ះពាល់ដល់សន្តិសុខជាតិ។
សូមបញ្ជាក់ថា កាលពីថ្ងៃទី ២៧ ខែមីនា ម្សិលមិញ វិទ្យុអាស៊ីសេរីបានចុះផ្សាយនូវអត្ថបទមួយ មានចំណងជើងថា ពលរដ្ឋតាមព្រំដែនចោទទាហានថៃថារំលោភយកទឹកដីខ្មែរ។ នៅក្នុងអត្ថបទនោះ វិទ្យុសអាស៊ីសេរីបានដកស្រង់នូវសម្តីបុរសវ័យជិត ៦០ឆ្នាំ ជាអតីតកងទ័ពខ្មែរក្រហម បានលើកឡើងថា ព្រំដែនក្នុងស្រុកសំឡូត ដែលកងទ័ពខ្មែរក្រហមគ្រប់គ្រងចន្លោះពីឆ្នាំ១៩៧៩ ដល់ឆ្នាំ១៩៩៦ ត្រូវថៃ រំលោភយកមិនតិចជាង ១០គីឡូម៉ែត្រ ពីច្រកព្រំដែនកម្ពុជា-ថៃនោះទេ៕
