ស្រវឹងបើករថយន្តបុកក្បាលនាគចែកទ្រូងផ្លូវក្រឡាប់ផ្ងារជើងច្រងាង
Cambodia News
ភ្នំពេញ ៖ កាលពីវេលាម៉ោង ២០ នឹង ៣០ នាទីយប់ថ្ងៃទី ២៦ ខែមិនា បុរសម្នាក់បើករថយន្តបរក្នុងល្បឿនលឿន ជ្រុលបុកក្បាលនាគចែកទ្រូងផ្លូវ ពេញទំហឹងតែម្តង បណ្តាលឲ្យ រថយន្តក្រឡាប់ផ្ងារជើងនៅកណ្តាលផ្លូវ ជិតស្ថានទូតចិន ក្នុងសង្កាត់ទួលទំពូងទី ២ ខណ្ឌចំការមន។
នគរបាលមូលដ្ឋានបានឲ្យដឹងថា មុនពេលកើតហេតុនោះគឺមានបុរសម្នាក់វ័យជាង ២០ ឆ្នាំ បានបើក រថយន្តកាមរីហាយប្រ៊ីត ពណ៌ទឹកប្រាក់ ពាក់ស្លាកលេខ ភ្នំពេញ 2T 7813 តាមបណ្តោយផ្លូវម៉ៅសេទុង ក្នុងទិស ដៅពីលិចទៅកើត ដោយបានបើកក្នុងល្បឿនយ៉ាងលឿន ខណៈមកដល់ចំណុចកើតហេតុខាងលើនេះ ទំនង អ្នកបើកបរបាត់បង់ស្មារតីក៏បណ្តាលឲ្យជ្រុលល្បឿនលឿនបុកចំពាក់ កណ្តាលក្បាលនាគចែកទ្រូងផ្លូវពេញទំហឹង តែម្តង ធ្វើឲ្យរថយន្តក្រឡាប់ផ្ងារជើងម្ខាងច្រងាងនៅចំណុចកណ្តាលផ្លូវ ប៉ុន្តែសំណាងល្អដែលក្នុងហេតុការណ៍ នេះគ្មានអ្នករងរបួសធ្ងន់ធ្ងរ ។
ក្រោយកើតហេតុម្ចាស់រថយន្តបានចុះរត់គេចខ្លួនបាត់ស្រមោលតែម្តង ប៉ុន្តែសាក្សី ដែលឃើញហេតុការណ៍ភ្លាមៗនោះបាននិយាយថាបុរសជាអ្នកបើករថយន្តបង្កហេតុ អាយុ ជាង ២០ ឆ្នាំ ហើយស្ថិតក្នុងស្ថានភាពស្រវឹង ។
ក្នុងហេតុការណ៍នេះនគរបាលមូលដ្ឋាននឹងនគរបាលចរាចរណ៍ខណ្ឌ ចំការមនសហការជាមួយសមត្ថកិច្ចជំនាញវាស់វែងស្ទូចយករថយន្តបង្កហេតុទៅ រក្សាទុកការិយាល័យចរាចរណ៍ ជើងគោករាជធានីភ្នំពេញដើម្បីរង់ចាំដោះស្រាយតាមនីតិវិធីច្បាប់៕ ហេង នាង
