គណបក្សប្រជាជនកម្ពុជាប្រកាសបដិសេធរាល់សកម្មភាពដែលប៉ុនប៉ង ឬកៀបសង្កត់មកលើអធិបតេយ្យរបស់កម្ពុជា
សារព័ត៌មាន Cambodia News/
ថ្ងៃចេញផ្សាយៈ June 28, 2022/
ភ្នំពេញ ៖ ថ្លែងក្នុងនាមប្រធានគណបក្សប្រជាជនកម្ពុជា នាឱកាសអញ្ជើញប្រារព្ធពិធីមីទ្ទីងរំឭកខួបទី៧១ ថ្ងៃបង្កើតគណបក្សប្រជាជនកម្ពុជា (២៨.៦.១៩៥១-២៨.៦.២០២២) នាព្រឹកថ្ងៃទី២៨ ខែមិថុនានេះ សម្ដេចតេជោ ហ៊ុន សែន ប្រកាសបដិសេធ រាល់សកម្មភាពទាំងឡាយណាទោះចេញពីប្រភពណាក្តី ដែលប៉ុនប៉ងនាំកម្ពុជាឲ្យឃ្លាតចេញពីមាគ៌ា ឬកៀបសង្កត់មកលើអធិបតេយ្យរបស់កម្ពុជា។
សម្ដេចតេជោបានថ្លែងបញ្ជាក់ថា គណបក្សប្រជាជនកម្ពុជា និងប្រជាជនកម្ពុជាទាំងមូល ការពារដាច់ខាតសន្តិភាព ស្ថិរភាព នយោបាយ និងសន្តិសុខរបស់ជាតិដែលជាលក្ខខណ្ឌជាសារវន្ត ដើម្បីធានាជីវភាពដ៏សុខសាន្តរបស់ប្រជាជនប្រកបដោយសេរីភាព កិត្តិយស និងសេចក្ដីថ្លៃថ្នូរ និងការអភិវឌ្ឍសេដ្ឋកិច្ច សង្គមប្រកបដោយ ចីរភាព មិនឲ្យអនុភាពប្រតិកិរិយាណា ទោះបីជាអសិរពិសយ៉ាងណាក៏ដោយមកបំផ្លាញបានឡើយ។
សម្ដេចតេជោបន្ដថា គណបក្សប្រជាជនកម្ពុជា បន្តពង្រឹងកិច្ចសហការយ៉ាងស្មោះសរជាមួយបណ្តាគណបក្សនយោបាយ អង្គការសង្គមស៊ីវិលនានា និងមជ្ឈដ្ឋានផ្សេងៗទៀតក្នុងសង្គមដែលមានភាពស្មោះត្រង់ និងសុឆន្ទៈពិតប្រាកដ ក្នុងគោលបំណងថែរក្សាបរិយាកាសនយោបាយល្អប្រសើរប្រកបដោយចីរភាព ជាពិសេស បរិយាកាសឆ្ពោះទៅកាន់ការបោះឆ្នោតជាតិ នីតិកាលទី៧ នាឆ្នាំ២០២៣ ខាងមុខ ៕
