កិច្ចពិភាក្សាស្តីពីការផ្សព្វផ្សាយពត៌មាន ពាក់ព័ន្ធក្រុមប្រឈមមុខខ្ពស់នឹងជំងឺអេដស៍
ភ្នំពេញ ៖ នៅព្រឹកថ្ងៃទី០៦ ខែធ្នូ ឆ្នាំ២០១៣នេះ ក្រុមប្រឈមមុខខ្ពស់ ជាមួយក្រុមអ្នកសារពត៌មានបានជួប ជុំគ្នានៅសណ្ឋាគារកង់ទីណង់តាល់ ដើម្បីពិភាក្សាស្វែងយល់អំពីគ្នាក្នុងការចូលរួមកាត់បន្ថយគ្រោះថ្នាក់ នៃគ្រឿងញៀន និងមេរោគអេដស៍ ដែលមានការអញ្ចើញចូលរួមពី វេជ្ជបណ្ឌិត តែង គន្ធី អគ្គនាយកអាជ្ញាធរជាតិប្រយុទ្ធនិងជំងឺអេដស៍ និងលោក វេជ្ជបណ្ឌិត អ៊ុំ សុភាព នាយកប្រតិបត្តិអង្គការខាណា ។
ថ្លែងនៅក្នុងកិច្ចពិភាក្សាតុមូលរវាងក្រុមប្រឈមមុខខ្ពស់ ជាមួយក្រុមអ្នកសារពត៌មាន លោកវេជ្ជបណ្ឌិត អ៊ុំ សុភាព បានមានប្រសាសន៍ថា គោលបំណងនៃកិច្ចពិភាក្សានេះដើម្បីស្វែងយល់អំពី ការវិវឌ្ឍន៍នៃការផ្តល់ឬផ្សព្វផ្សាយពត៌មានដែលពាក់ព័ន្ធក្រុម ប្រឈមមុខខ្ពស់ដោយមិនមានការរើសអើងរបស់ស្ថាប័នសារពត៌មាន ។
លោកវេជ្ជបណ្ឌិត អ៊ុំ សុភាព បានបញ្ជាក់ថាប្រព័ន្ធពត៌មានបានដើរតួនាទីយ៉ាងសំខាន់ក្នុងការផ្តល់ ការបញ្ជូននិងចែកចាយសារឬពត៌មានដល់មនុស្សទូទៅជាពិសេសក្រុមងាយ រងគ្រោះដោយសារមេរោគដស៍ ហើយត្រូវធានាថាសារពត៌មានទាំងនោះប្រកបដោយខ្លឹមសារ និងអត្ថន័យត្រឹមត្រូវ មានអំណះអំណាង និងមានប្រភពច្បាស់លាស់។
លោកបន្តថា ផ្អែកលើសកម្មភាពគម្រោងភាពជាដៃគូជាមួយប្រព័ន្ធផ្សព្វផ្សាយ ក្រុមការងារថ្នាក់ជាតិបុរសស្រឡាញ់បុរស បានដឹកនាំ និងរៀបចំតាក់តែងលើកម្មវិធីបណ្តុះបណ្តាលអ្នកសារពត៌មានអាជីព ដោយក្នុងនោះបានបណ្តុះបណ្តាលអ្នកសារពត៌មានដែលមកពីស្ថាប័ននានា ក្នុងប្រទេសកម្ពុជាហើយ ប្រធានបទសំខាន់ៗដែលលើកមកបណ្តុះបណ្តាលរួមមាន ស្ថានភាពមេរោគអេដស៍នៅកម្ពុជានាពេលបច្ចុប្បន្ន ។
គោលនយោបាយបីសូន្យ និងផែនការយុទ្ធសាស្ត្រជាតិសម្រាប់ការឆ្លើយតបនឹងមេរោគអេដស៍ ជំងឺអេដស៍។ ការបង្ហាញពីបញ្ហា និងការប្រឈមរបស់ក្រុមងាយរងគ្រោះដោយសារមេរោគអេដស៍។ តួនាទីរបស់ប្រព័ន្ធពត៌មាន ក្នុងការចូលរួមចំណែកទប់ស្កាត់ការរីករាលដាលមេរោគអេដស៍ និងការរើសអើងនិងការជ្រើសរើស និងប្រើប្រាស់ពាក្យឬភាសាក្នុងការសរសេរអត្ថបទ។ នាង/យុវវ័យថ្មី
