ទំនាក់ទំនងរុស្ស៊ី-អាមេរិក ឡើងតានតឹងមួយកម្រិតទៀត
មូលហេតុមកពីមហាអយ្យកាអាមេរិកាំង ទើបប្រកែកពុំព្រមធ្វើការចោទប្រកាន់ ទៅ លើគ្រួសារជាតិអាមេរិកាំង គឺម្តាយនិងឪពុក មានត្រកូលថា Shatto ដែលកាលពីខែតុលា ឆ្នាំទៅមិញ ចេះទទួលបានកុមារារុស្ស៊ី២នាក់ ជាបងប្អូនបង្កើតនឹងគ្នា យកទៅធ្វើជាកូនចិញ្ចឹម ហើយដែលពីក្នុង២នាក់នោះ រំលងតែ៣ខែសោះ មានម្នាក់ស្រាប់ តែស្លាប់ទៅ។
កុមារដែលស្លាប់នោះ ជាកូនបងឈ្មោះជារុស្ស៊ីថា Maxim Kouzmine អាយុ៣ឆ្នាំ ក្រោយពីទៅដល់អាមេរិក បានទទួលឈ្មោះអាមេរិកាំងថា Max Shatto។ តាមមតិភាគីរុស្ស៊ី ការដែលរដ្ឋអាជ្ញាអាមេរិកពុំព្រមចោទប្រកាន់នឹងពុំព្រមកសាងសំណុំរឿង ព្រហ្មទណ្ឌ ទល់នឹងឳពុកម្តាយនៃកូនចិញ្ចឹមនោះ គឺជាការមើល ថោកមើលស្រាលចំពោះជីវិតជាតិរុស្ស៊ី។
តាមការពន្យល់បំភ្លឺនៃលោករដ្ឋអាជ្ញា Bobby Blend ៖ “គណៈចៅក្រមមានគ្នា១២នាក់ តំណាងឲ្យសាធារណជន រដ្ឋTexas ជារដ្ឋរស់នៅដោយគ្រួសារអាមេរិកាំងនោះ ដោយយោងទៅលើកោសល្យវិច័យធ្វើដោយគ្រូពេទ្យលើសពកុមារនោះ បង្ហាញឲ្យឃើញថា កុមារ Max Shatto បានធ្លាក់ខ្លួនស្លាប់ ទៅគឺដោយមកពីឧបទ្ទវហេតុជាចៃដន្យអាក្រក់ទេតើ ដ្បិត ពេលវាលេងនៅទីធ្លាផ្ទះ នាថ្ងៃទី២១ មករា ឆ្នាំនេះ វាស្រាប់តែដួលត្រូវចំកន្លែងដែលគ្រោះ ថ្នាក់ដល់ជីវិតតែម្តង។ប្រាកដណាស់ ដែលកាលណាមនុស្សស្លាប់ដោយ មានវ័យនៅក្មេងខ្ចីបែបនេះ គេពិតជាមានបំណងរកមុខអ្នកដែលជាប់ពិរុទ្ធក្នុងមរណភាពនេះ។ ប៉ុន្តែ ក្នុងករណីដែលមាន គឺគ្មានអ្វីជាតឹកតាងសម្រាប់ធ្វើការចោទប្រកាន់ឡើយ។ កោសល្យវិច័យក៏បង្ហាញថា ក្នុងរូបកាយសពនោះគ្មានសោះឡើយស្នាមនៃជាតិពុលស្អីណា ដូចដែលតំណាងពេញសមត្ថកិច្ចរបស់ប្រមុខរដ្ឋរុស្ស៊ីខាងការពារសិទ្ធិ កុមារ លោកមេធាវី Pavel Astakhov រមែងបកស្រាយឡើយ”។
អ្នកច្បាប់រុស្ស៊ីនេះ ដែលបានថ្លែងផ្តន្ទាទោសទៅហើយដល់ការសម្រេច ចិត្តរបស់រដ្ឋអាជ្ញា អាមេរិកាំង ពុំព្រមធ្វើការចោទប្រកាន់លើឪពុកនិងម្តាយជាតិអាមេរិកាំង មានត្រកូលថាShatto ថ្ងៃអង្គារនេះ គ្រោងជួបពិភាក្សាអំពីសាច់រឿងដែលមាន ជាមួយឯកអគ្គរដ្ឋទូតស.រ.អា. ប្រចាំក្រុងម៉ូស្គូ គឺលោក Michael McFaul។
ការស្លាប់ទៅនៃកុមាររុស្ស៊ី អាយុទើប៣ឆ្នាំ មានឈ្មោះដើមថា Maxim Kouzmine និងបានទទួលឈ្មោះអាមេរិកាំងថា Max Shatto គឺជាករណីស្លាប់ទី២០ នៃកុមាររុស្ស៊ីដែលត្រូវបានប្រគល់ទៅជាកូនចិញ្ចឹម នៅតាមគ្រួសារអាមេរិកាំង បើគិតតាំងពីឆ្នាំ១៩៩៦មក។ ហើយស្លាប់នេះ តាមពិតជាអត្រាមិនខ្ពស់ទេ បើប្រៀបទៅនឹងចំនួនកុមាររុស្ស៊ីដល់ទៅ ៦០.០០០នាក់ឯណោះ ដែលបានឆ្លងទៅជាកូនចិញ្ចឹមនៅតាមច្រកល្ហកប្លែកៗនៃស.រ.អា. ដ្បិតក្នុងអំឡុងពេលដូចគ្នានេះ នៅតាមគ្រួសាររុស្ស៊ីផ្ទាល់ មានកូនចិញ្ចឹមធ្លាក់ខ្លួនស្លាប់ ដល់ទៅ១.៥០០នាក់។
ទោះយ៉ាងណាក្តី ក៏រុស្ស៊ីជាប្រតិកម្មទល់នឹងច្បាប់អាមេរិកាំង ដែលប្រឆាំងនឹងពួកមន្ត្រីខ្លួន កាលពីចុងឆ្នាំ២០១២ កន្លងទៅ បានអនុម័តច្បាប់ដែលហាមមិនឲ្យគ្រួសារអាមេរិកាំង អាចសុំកុមាររុស្ស៊ីយកទៅធ្វើជាកូនចិញ្ចឹមទៀតឡើយ។ ការអនុម័តច្បាប់ប្រឆាំងគ្នាទៅវិញទៅមកនេះ បានអូសទាញទំនាក់ទំនងរុស្ស៊ី-អាមេរិកាំង ឲ្យធ្លាក់ក្នុងភាពតានតឹង សឹងមើលមុខគ្នាលែងចំ៕ដោយ កែវ ឆាយា (RFI)