ពិធីករវិទ្យុពាណិជ្ជកម្មម្នាក់នៅអូស្រ្ដាលីត្រូវគេផ្អាកការងារបន្ទាប់ពីសួរសំណួរ “តើដៃគូរបស់លោកស្រី Julia Gillard ជាមនុស្សខ្ទើយឬយ៉ាងណា?”
ស្ថានីយ៍វិទ្យុពាណិជ្ជកម្មមួយរបស់ ក្រុម ហ៊ុនព័ត៌មាន Fairfax នៅទីក្រុង Perth នៃប្រទេសអូស្រ្តាលីបានព្យួរការងារពិធីករម្នាក់បន្ទាប់ពីលោកបាន សួរសំណួរមួយទៅលោកស្រីនាយករដ្ឋមន្ដ្រីអូស្រ្តាលីថា តើដៃគូរបស់លោកស្រី គឺជាមនុស្សខ្ទើយ ឬយ៉ាងណា។
ក្នុង ពេលធ្វើបទសម្ភាសន៍ជាមួយលោកស្រី Julia Gillard លោក Howard Sattler បានដេញដោលសួរលោកស្រី ដើម្បីឆ្លើយតបនឹងថាពាក្យចចាមអារ៉ាមតៗគ្នាដែលថា ដៃគូរបស់លោកស្រីគឺជាមនុស្សខ្ទើយ។
លោក Sattler បានឲ្យដឹងថា លោកមិនបាននិយាយថា ដៃគូរបស់អ្នកស្រីគឺជាមនុស្សខ្ទើយនោះទេ ប៉ុន្តែវាជាអ្វីដែលអ្នកផ្សេងទៀតបាននិយាយតៗគ្នា។ តែទោះជាយ៉ាងណាក៏ដោយលោកស្រី Julia Gillard បានឱ្យដឹងថា វាមិនសមរម្យទំនងទាល់តែសោះក្នុងការចោទសួរលោកស្រីពីបញ្ហានេះ ។
អ្នក គ្រប់គ្រងវិទ្យុនេះ បានសម្រេចចិត្តព្យួរការងារលោក Sattler បន្ទាប់ពីបានពិនិត្យសារឡើងវិញនូវបទសម្ភាសន៍នេះ។ ក្រុមអ្នកគ្រប់គ្រងវិទ្យុនេះបាននិយាយថា សំណួរនេះគឺគ្មានការគោរពបន្ដិចណាទាល់តែសោះ ហើយក៏មិនជាប់ទាក់ទងទៅនឹងកិច្ចពិភាក្សាអំពីបញ្ហានយោបាយនោះដែរ៕ (Radio Australia)