សារាយ ព្រះកាយច័ន្ទ ស្ថិតក្នុងគំនាបអ្នកដឹកនាំកម្មវិធី
តារាសម្តែងនិងជាតារាបង្ហាញម៉ូតវ័យក្មេងក្នុងក្រុម Cambodia Super Model នាង សារាយ ព្រះកាយច័ន្ទ កំពុងតែស្ថិតនៅក្នុងគំនាបរបស់អ្នកដឹកនាំកម្មវិធីទូរទស្សន៍ចំនួន២ ដែលតម្រូវឲ្យនាងធ្វើការសម្រេចចិត្តយកមួយក្នុងនាមជាពិធីការិនី បន្ទាប់ពីនាងកំពុងតែមានការប្រទាញប្រទង់គ្នាសម្រាប់តំណែងមួយនេះ។
ស្ថិតនៅក្នុងមាគ៌ាសិល្បះដ៏ជោគជ័យ ព្រះកាយច័ន្ទ ដែលមានឈ្មោះពិតថា រ៉ា សូនីតា បានក្លាយជាពិធីការិនីប្រចាំស្ថានីយទូរទស្សន៍អប្សរានៅក្នុងកម្មវិធី “ប្រស្នាតារា” ដែលត្រូវបានគេដឹកថាដឹកនាំដោយលោក ហ្វៃ សំអាង។ តំណែងដ៏ធំនិងលើកដំបូងមួយនេះត្រូវបានអ្នកដឹកនាំរឿងដ៏ល្បីល្បាញរូបនេះផ្តល់ឲ្យនាង ដើម្បីជំនួសតំណែងតារាសម្តែងមេម៉ាយកូនមួយនាង ឌុច សោភា ដែលបានខ្ទាតពីតំណែងនេះបន្ទាប់ពីអ្នកដឹកនាំកម្មវិធីយល់ថា នាង ឌុច សោភាហាក់មិនសូវមានទេពកោសល្យនិងវោហាស័ព្ទនៅក្នុងតំណែងមួយនេះឡើយ។
ក៏ប៉ុន្តែអ្វីដែលគេនឹកស្មានមិនដល់នោះ ស្រាប់តែតារាសម្តែងរូបនេះកាន់តំណែងនៅក្នុងកម្មវិធីមួយនេះមិនទាន់ទាំងបានក្តៅក្បាលមេក្រូផងនោះ ក្នុងរយះពេលចុងក្រោយថ្មីៗនេះព្រះកាយច័ន្ទ បានអវត្តមាននៅក្នុងកម្មវិធីទូរទស្សន៏អប្សរា ដោយជំនួសមកវិញដោយអ្នកនាងព្រំ រដ្ឋា វិញធ្វើឲ្យគេយល់ថា តារារូបនេះប្រហែលជាអាចរបូតតំណែងមួយនេះដូចនាង ឌុច សោភា ផងដែរ។
ទោះជាយ៉ាងណាក៍ដោយការអវត្តមានរបស់ព្រះកាយច័ន្ទ នាពេលនេះត្រូវបានក្រុមគ្រួសាររបស់នាងអះអាងថា នាងមិនបានរបូតតំណែងជាពិធីការិនីនៅទូរទស្សន៍អប្សរាឡើយ ពោលគេនាងសុំច្បាប់មួយរយះដើម្បីថតកុន។ ប្រភពដដែលបានបញ្ជាក់ថា បន្ទាប់ពីការងារថតនោះចប់នាងនិងវិលមកកាន់កម្មវិធីនោះជាធម្មតា ដោយមិនមានអ្វីប្រែប្រួលឡើយ។
ផ្ទុយពីការលើកឡើងនោះប្រភពដែលស្និតនិងលោក ហ្វៃ សំអាង ដែលជាអ្នកដឹកនាំកម្មវិធីប្រស្នាតារា បានអះអាងថា ព្រះកាយច័ន្ទមិនបានជាប់រវល់ថតខ្សែភាពយន្តឡើយ ពោលគឺនាងកំពុងតែកាន់កម្មវិធីជាពិធីការិនីនៅក្នុងកម្មវិធីធំមួយនៅក្នុងស្ថានីយទូរទស្សន៍ខ្មែរប៉ុស្តិ៍លេខ៩។ ប្រភពខាងលើកក៍បានបញ្ជាក់ផងដែរថា មូលហេតុមួយនេះបានធ្វើឲ្យលោក ហ្វៃ សំអាង មានការខឹងសម្បាយ៉ាងខ្លាំង បន្ទាប់ពីនាងបានសន្យាមុនមកធ្វើជាពិធីការិនីនៅក្នុងកម្មវិធីរបស់លោកថា នឹងមិនទៅថតឲ្យអ្នកណាផ្សេងនោះឡើយ។
បញ្ហាមួយនេះបានធ្វើឲ្យអ្នករៀបចំកម្មវិធីប្រចាំស្ថានីយទូរទស្សន៍ទាំងពីរខាងលើបានដាក់គំនាបមួយដល់តារាសម្តែងរូបនេះ ដើម្បីជ្រើសរើស ដោយមិនអនុញ្ញាតឲ្យនាងខ្លួនមួយជាន់ទូកពីរឡើយ។
គេជឿថា គំនាបមួយនេះអាចជាការលំបាកមួយសម្រាប់តារាសម្តែងដែលមាននិស្ស័យសិល្បះតាំងពីតូចរូបនេះ ក្រោយពេលដែលនាងបានប្រឹងប្រែងយ៉ាងខ្លាំងនៅលើវិថីសិល្បះរហូតមកដល់ចំណុចមួយនេះ។ បើទោះបីជានាងមិនមានបទពិសោធន៍ច្រើននៅក្នុងអាជីពជាពិធីការិនីនេះក៍ដោយ តែនាងបានខិតខំធ្វើបានយ៉ាងល្អ បន្ទាប់ពីនាងបានឈានជើងមកកាន់កម្មវិធី“ប្រស្នាតារា” របស់ស្ថានីយទូរទស្សន៍អប្សរាប៉ុស្តិ៍លេខ១១មួយរយះនេះមក។
ទោះជាយ៉ាងណាតំណែងជាពិធីការិនីប្រចាំស្ថានីយទូរទស្សន៍ណាមួយឲ្យពិតប្រាកដក្នុងចំណោមស្ថានីយទូរទស្សន៍ទាំងពីរខាងលើកនេះគឺស្ថិតក្នុងជម្រើសរបស់តារាសម្តែងដែលមានដើមកំណើតមកពីខេត្តកណ្តាលរូបនេះ ខណះពេលដែលនាងនៅមិនទាន់បានចុះកុងត្រាណាមួយជាមួយស្ថានីយទូរទស្សន៍ទាំងពីរខាងលើនេះឡើយ មានន័យថា តួនាទីរបស់នាងនៅតែមានភាពឯករាជ្យដដែល។
គួបញ្ជាក់ថា ក្រោយពីដំណើរការបានប្រមាណជាង៣ខែ កម្មវិធី “ប្រស្នាតារា” នេះបានផ្លាស់ប្ដូរពិធីករ-ពិធីការិនី៤នាក់មកហើយ ដែលដើមឡើយ គឺមានលោក អេឡិច រ៉ូហ្សា និងនាង ឌុច សុភា លុះក្រោយមក នាង ឌុច សុភា សុំឈប់ ក៏ដាក់នាង ព្រះកាយច័ន្ទ ចូលជំនួយ។ មិនទាំងបានមួយខែស្រួលបួលផង ក៏ដូរលោក អេឡិច រ៉ូហ្សា ចេញទៀត ដោយដាក់លោក អ៊ុន សុធា ចូល ហើយក្រោយមកទៀតបាត់វត្តមាននាងព្រះកាយច័ន្ទ ក៏លេចនាង ព្រំ រដ្ឋា ចូលមកជំនួស ៕ ស.រ
