បុរសម្នាក់បើករថយន្តប៉ះរថយន្តគេហើយបើករត់
ភ្នំពេញ៖ កាលពីវេលាម៉ោង១និង៣០នាទីអាធ្រាត្រ ឈានចូលថ្ងៃទី២០ ខែកុម្ភៈ បុរសម្នាក់បានបើករថយន្តជ្រុលទៅប៉ះក្បាលរថយន្តគេ ហើយបើករត់ត្រូវសមត្ថកិច្ចតាមចាប់បាន នៅតាមបណ្ដោយផ្លូវ២០០៤ កែងមហាវិថីសហព័ន្ឋរុស្ស៊ី ក្នុងសង្កាត់កាកាប ខណ្ឌពោធិ៍សែនជ័យ។
មុនពេលកើតហេតុបុរសរូប នោះបានបើករថយន្តម៉ាកកាមរី ស៊េរី៨៥ តាមបណ្ដោយផ្លូវ២០០៤ ក្នុងទិសដៅពីត្បូងទៅជើង ឡើងទៅមហាវិថីសហព័ន្ឋរុស្ស៊ី បើកបរក្នុងល្បឿនលឿន ជាន់ហ្វ្រាំងមិនទាន់ ក៏ជ្រុលទៅប៉ះក្បាលរថយន្តកាមរីបាឡែន ពណ៌ទឹកប្រាក់ បើកបរដោយបុរសម្នាក់ តាមបណ្ដោយមហាវិថីសហព័ន្ឋរុស្ស៊ី ពីលិចទៅកើត បណ្ដាលឲ្យរថយន្តរលាត់ថ្នាំតិចតួច តែបែរជាអ្នកបើករថយន្តបង្កមិនព្រមឈប់រថយន្តដោះស្រាយគ្នា បែរជាបើករត់ ក៏ត្រូវសមត្ថកិច្ចនគរបាលបើកប្រដេញទៅដល់សណ្ឋាគារទន្លេសេកុង ក៏ឃើញរថយន្តបត់ចូល សមត្ថកិច្ចក៏យកម៉ូតូទៅពាំងពីក្រោយ បែរជាបុរសអ្នកបើករថយន្តបង្កហេតុ បើកថយក្រោយបុកម៉ូតូសមត្ថកិច្ចទៅវិញ បណ្ដាលឲ្យដួលរងការខូចខាតម៉ូតូ និងរងរបួស។
ក្រោយពេលកើតហេតុសមត្ថកិច្ចនគរបាលបានធ្វើការឃាត់ទាំងរថយន្ត និងអ្នកបើកបរទៅអធិការដ្ឋានខណ្ឌពោធិ៍សែនជ័យដើម្បីធ្វើការអប់រំ និងពិន័យតាមនីតិវិធីច្បាប់ ៕ ហេង នាង