សម្តេចតេជោ នឹងទទួលបានពានរង្វាន់អ្នកកាន់ដំណែងយូរបំផុតនៅអាស៊ាន
សារព័ត៌មាន Cambodia News/
ភ្នំពេញ (០៣ សីហា ២០១៦) ៖ តាមសេចក្តីប្រកាសព័ត៌មានរបស់ក្រសួងការបរទេសកម្ពុជា បានឲ្យដឹងថា សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា នឹងដឹកនាំគណៈប្រតិភូទៅកាន់ប្រទេសឡាវនៅចុងសប្តាហ៍នេះ ដើម្បីចូលរួមវេទិកាភាពជាអ្នកដឹកនាំអាស៊ានលើកទី១៣ និងទទួលពានរង្វាន់សមិទ្ធិផលអមតៈអាស៊ានដែលជាពានរង្វាន់សម្រាប់ប្រមុខរដ្ឋដែលបានបំរើការងារយូរជាងគេនៅអាស៊ាន។
ក្នុងសេចក្តីប្រកាសដដែលឲ្យដឹងថាកិច្ចប្រជុំនោះចាប់ពីថ្ងៃទី៦ដល់ថ្ងៃទី៧សីហានេះ នៅទីក្រុងវៀងច័ន្ទ ប្រទេសឡាវ។ ការអញ្ជើញទៅរបស់សម្តេចតេជោ ហ៊ុន សែន គឺតបតាមការអញ្ជើញរបស់ប្រធានវេទិកាភាពជាអ្នកដឹកនាំអាស៊ាន និងជានាយកប្រតិបត្តិនៃវិទ្យាសាស្ត្រ និងភាពជាអ្នកដឹកនាំអាស៊ីលោក តាន់ស្រ៊ី ម៉ៃឃិលយ៉ូស។
បើតាមសេចក្តីប្រកាសព័ត៌មាននេះសម្តេចតេជោ ហ៊ុន សែន ជាមនុស្សទី៤ហើយ ដែលនឹងត្រូវទទួលបានពានរង្វាន់នេះ បន្ទាប់ពីអតីតនាយករដ្ឋមន្រ្តីសិង្ហបុរីលោក លី ក្វាន់យូ អតីតនាយករដ្ឋមន្រ្តីម៉ាឡេស៊ី លោក មហាធៀ ម៉ូហាម៉េដ និងព្រះអង្គម្ចាស់ស៊ុលតង់ ណាសរិនសាហ៍ នៃរដ្ឋបារ៉ាករបស់ប្រទេសម៉ាឡេស៊ី៕
