ផឹកស្រាស្រវឹងបើករថយន្ដបុករនាំងដែកបាក់អស់ ៦ផ្ទាំង
ភ្នំពេញ ៖ កាលពីវេលា ម៉ោង១១និង១០នាទីយប់ ថ្ងៃទី១៨ ខែ កុម្ភៈ បុរសម្នាក់បើករថយន្ដ ទាំងស្រវឹងជ្រុលទៅបុករនាំងដែកចែក ទ្រូងផ្លូវបាក់អស់៦ផ្ទាំង ស្ថិតនៅតាមផ្លូវ សហព័ន្ធរុស្ស៊ីក្នុងសង្កាត់ផ្សារដេប៉ូ៣ ខណ្ឌទួលគោក។
បុរសដែលបើករថយន្ដបង្កហេតុ ឈ្មោះប៉េង ហួត អាយុ៣៤ឆ្នាំ ស្នាក់នៅ ក្នុងបុរីពិភពថ្មី សង្កាត់ភ្នំពេញថ្មី ខណ្ឌ សែនសុខបើករថយន្ដម៉ាកឡិចស៊ីស ES-300 ពណ៌ត្រីឆ្លូញ ពាក់ស្លាកលេខ ភ្នំពេញ2M-7869 ។
តាមប្រភពព័ត៌មានពីសមត្ថកិច្ច នគរបាលខណ្ឌទួលគោកបានឱ្យដឹងថា នៅ មុនពេលកើតហេតុបុរសរូបនេះបានបើក រថយន្ដតាមផ្លូវសហព័ន្ធរុស្ស៊ីក្នុងទិសដៅពីកើតទៅលិច លុះមកដល់ចំណុចកើត ហេតុខាងលើក៏បានជ្រុលទៅបុករនាំង ដែកចែកទ្រូងផ្លូវបាក់អស់៥ផ្ទាំងនិងវៀច១ផ្ទាំងធ្វើឱ្យរថយន្ដ បែកកង់ខាងឆ្វេង ហើយអ្នកបើកបរមិនបានឈប់រថយន្ដ នោះទេគឺព្យាយាមបើករថយន្ដរត់គេចខ្លួនរហូតដល់ផ្លូវលេខ៥៦៦ក្នុង សង្កាត់បឹង កក់១ ខណ្ឌទួលគោកទើបកម្លាំង នគរបាល ដេញចាប់បាន ។
បន្ទាប់ពីធ្វើការឃាត់ ខ្លួនម្ចាស់រថយន្ដនិងរថយន្ដបានហើយ ម្ចាស់រថយន្ដទំនើងរូបនោះបានចុះពីលើ រថយន្ដដេញវាយសមត្ថកិច្ចផ្អើលទាំង កណ្ដាលយប់ ព្រោះតែបុរសរូបនោះ ស្រវឹងជោកជាំ ហើយសមត្ថកិច្ចនគរបាល ខណ្ឌទួលគោកក៏សម្រេចចិត្ដឃាត់ខ្លួន ជននេះញាត់ចូលទៅក្នុងរថយន្ដរួចបញ្ជូនទៅនគរបាលចរាចរជើងគោក រាជធានីភ្នំពេញដើម្បីចាត់ការបន្ដទៅតាមផ្លូវច្បាប់ ៕ ហេង នាង
