ក្រុមនិកាយChiite នៅប៉ាគីស្ថានក្លាយជាផ្ទាំងស៊ីបនៃការវាយប្រហារភេរវកម្ម
តុល្យការ នៃភេរវកម្មបំផ្ទុះគ្រាប់បែក នៅល្ងាចថ្ងៃសៅរ៍ទី១៦កុម្ភៈ ឆ្នាំ២០១៣ នៅក្រុងQuetta ខេត្តBaloushistan ភាគខាងនិរតីប្រទេសប៉ាគីស្ថាន កាន់តែធ្ងន់ធ្ងរឡើងៗជាលំដាប់។ មានស្លាប់យ៉ាងហោចណាស់ ៨១នាក់ និងជាង២០០នាក់រងរបួស ក្នុងនោះ២០ធ្ងន់ធ្ងរខ្លាំង។ គ្រាប់បែកបញ្ជាពីចម្ងាយបានផ្ទុះឡើងនៅក្បែរផ្សារ ឯការស្វែងរកជនរងគ្រោះក្នុងគំនរថ្មបាក់បែក នៅតែបន្តនៅព្រឹកថ្ងៃអាទិត្យនេះ។
ដោយ ហេតុថាក្នុងចំណោមអ្នករបួសជិត២០០នាក់ មានប្រមាណ២០នាក់ ស្ថិតក្នុងស្ថានភាពដុនដាបខ្លាំង តុល្យការនៃមនុស្សស្លាប់ក្នុងភេរវកម្មបំផ្ទុះគ្រាប់បែកថ្ងៃទី ១៦កុម្ភៈ នឹងអាចកើនឡើងជាក់ជាប្រាកដ។
ភេរវកម្ម បានកើតឡើងនៅម៉ោង ៦ល្ងាចថ្ងៃសៅរ៍ម្សិលមិញ ប៉ុន្តែរហូតមកទល់នឹងព្រឹកថ្ងៃអាទិត្យនេះ ហ្វូងមនុស្សនៅបន្តរុករកក្នុងគំនរបែកបាក់។ យប់មិញ ក្រុមអ្នកសង្គ្រោះបាន រកឃើញជនរងគ្រោះជាច្រើននៅក្រោមផ្ទាំងគំនរថ្មអាគារនិងផ្ទះដែល បាក់ស្រុតក្រោមឥទ្ធិពលនៃបំផ្ទុះគ្រាប់បែក។
គ្រាប់បែកដែលត្រូវបានយកមកបង្កប់ក្នុងឡានស៊ីទែនដឹកប្រេង ចតក្បែរផ្សារមួយ ក្នុងសង្កាត់របស់ក្រុង Quetta ដែលមានបណ្តាជនប៉ាគីស្ថាននិកាយChiitesរស់នៅច្រើនកកកុញ។ ក្រុមនិកាយឈីអ៊ីតប៉ាគីស្ថាន គឺជាក្រុមជនជាតិភាគតិចដើមកំណើត Hazara តំណាងឱ្យតែប្រមាណ២០%នៃប្រជាជនប៉ាគីស្ថានសរុបជាង១៨០លាននាក់ (ភាគច្រើនជាអ្នកកាន់សាសនាអ៊ីស្លាមនិកាយSunnites)។ ក្រុមនិកាយនេះ តែងរងគ្រោះជាញឹកញាប់ពីការវាយប្រហារពីសំណាក់ក្រុមប្រដាប់អាវុធ ក្នុងតំបន់ Baloutchistan មានជាអាទិ៍អង្គការប៉ាគីស្ថានជ្រុលនិយម Lashkar-e-Jhangvi (LeJ)ដែលបានប្រកាសភាពនៅល្ងាចម្សិលមិញ ថាជាអ្នករៀបចំធ្វើភេរវកម្មបំផ្ទុះគ្រាប់បែកនេះ។
សូមបញ្ជាក់ថា អង្គការ Lashkar-e-Jhangvi នេះជាក្រុមដែលហាមឃាត់ដោយច្បាប់ នៅប៉ាគីស្ថាន ប៉ុន្តែក្រុមនេះតែងបន្តធ្វើភេរវកម្មប្រឆាំងនឹងពួក chiites។
ព្រឹកមិញ សារព័ត៌មានប៉ាគីស្ថាន បានយក ព្រឹត្តិការណ៍ភេរវកម្មនេះ មកចុះផ្សាយនៅទំព័រមុខ និងបានរំលឹកថា កាលពីពីជាងមួយខែមុនក៏មានភេរវកម្មបង្ហូរ ឈាមធ្ងន់ធ្ងរ ផ្តាច់ជីវិតបណ្តាជននិកាយឈីអ៊ីតជិតមួយរយនាក់ដូចគ្នា។
បើតាមអភិបាលខេត្ត Baloutchistan នារយៈពេលប៉ុន្មានឆ្នាំចុងក្រោយនេះ ក្រុមនិកាយChiites បានក្លាយជាផ្ទាំងស៊ីបនៃការវាយប្រហារពីសំណាក់អង្គការ(LeJ) ដែលជា ក្រុម ជ្រុលនិយមនិកាយSunnites។ ប៉ុន្តែក៏សបញ្ជាក់ឱ្យឃើញអំពីបរជ័យរបស់ក្រុមស៊ើបការណ៍សំងាត់ និងកងរក្សាសន្តិសុខប៉ាគីស្ថានផងដែរ។
ក្រុមLashkar-e-Jhangvi ដដែលនេះ ធ្លាប់បានធ្វើភេរវកម្ម នៅមុខនិងខាងក្នុងក្លឹបប៊ីយ៉ា នៃក្រុង Quetta ដែលកាលណោះបានផ្តាច់ជីវិតមនុស្សជាង៩០នាក់ ភាគច្រើនជាក្រុមនិកាយchiitesដែរ។ ក្រោយភេរវកម្មនោះភ្លាម ក្រុមគ្រួសារជនរងគ្រោះ បានបដិសេធមិនព្រមបញ្ចុះសពភ្លាមទេ។ បាតុកម្មជាច្រើនបានរៀបចំឡើងនៅស្ទើរទូទាំងប្រទេស ដើម្បីទាមទារឱ្យរដ្ឋាភិបាលការពារក្រុមជនជាតិភាគតិចនិកាយChiites។ជាចម្លើយ តបក្រុងអ៊ីស្លាម៉ាបាត បានបញ្ចប់តំណែងអភិ បាលខេត្ត Baloutchistan។ ដូច្នេះគឺអំណាចកណ្តាលនៅអ៊ីស្លាម៉ាបាតជាអ្នកគ្រប់គ្រងរដ្ឋាបាល ខេត្តនេះផ្ទាល់ តែមិនគ្រប់គ្រាន់សម្រាប់ទប់ស្កាត់អំពើភេរវកម្មដូចថ្ងៃម្សិលមិញ នេះបានឡើយ។
នៅថ្ងៃនេះទៀត ក្រុមនិកាយChiites បានប្រកាសធ្វើបាតុកម្មទ្រង់ទ្រាយធំ ប្រសិនបើអាជ្ញាធរមិនចាត់វិធានការណ៍ចាប់ខ្លួនមេខ្លោងធ្វើ ភេរវកម្មប្រឆាំងនឹងក្រុមនិកាយជនជាតិភាគតិចនេះឱ្យបានឆាប់ៗនោះទេ៕ដោយ អៀង សុខម៉ិញ(RFI)