ស៊ីម ថៃណា លះបង់ការសម្តែងក្នុងស្រុក
តារាចម្រៀងសំបុរស្រអែម ដើមទ្រូងស៊ិចស៊ី នាង ស៊ឹម ថៃណា បែជាពោលពាក្យដោយមិនអល់ឯកថា នាងមិនស្តាយកេរ្តិឈ្មោះដែលនាងបានសាងក្នុងវិថីសិល្បះជាង១០មកនេះឡើយ ខណះពេលដែលនាងស្ទើរតែបោះបង់ចោលទាំងស្រុងក្នុងការសម្តែងនៅក្នុងស្រុក ដោយជំនួសការសម្តែងក្រៅស្រុកវិញ។
ការបាត់មុខពីកញ្ចក់ទូរទស្សន៍របស់នាង ស៊ីម ថៃណា បានធ្វើឲ្យទស្សនិកស្ទើរតែភ្លេចរូបនាងទៅហើយ ដែលនាំឲ្យគេគិតថា តារាចម្រៀងរូបនេះអាចនឹងសម្រេចចិត្តដើរចេញពីសិល្បះទាំងបង្ខំ បន្ទាប់ពីវីដេអូបង្ហាញពីការរាំស្រើបស្រាលរបស់នាងនិងបុរសវ័យក្មេងម្នាក់ធ្លាយចេញជាសាធារណះនោះ។
បើទោះជារឿងរ៉ាវមួយនេះបានស្ងប់ស្ងាត់ តែតារាចម្រៀងដែលចូលចិត្តបង្អួតដើមទ្រូងរូបនេះនៅតែមិនព្រមបង្ហាញខ្លួនតាមកញ្ចក់ទូរទស្សន៍ឲ្យក្រាស់ក្រែលដោយមុនដដែល បើទោះបីជាគេដឹងថា នាងកំពុងតែមានវត្តមាននៅក្នុងស្រុកខ្មែរក៍ដោយ។
មានការលើកឡើងថា ប្រសិនបើនាង ស៊ឹម ថៃណា នៅតែអូសបន្លាយពេលមិនព្រមបង្ហាញមុខឲ្យបានញឹកញាប់ដូច្នេះនោះវាអាចនឹងធ្វើឲ្យប្រជាប្រិយភាពរបស់នាងដែលខំសាងជាង១០ឆ្នាំមកនេះដាំក្បាលចុះវិញ។
ស្របទៅនឹងការលើកឡើងបែបនេះ ស៊ឹម ថៃណា បានអះអាងមិនរារែកចិត្តថា នាងមិនបានសោកស្តាយកេរ្តិ៍ឈ្មោះក្នុងវិថីសិល្បះដែលនាងបានសាងជាង១០ឆ្នាំមកនេះឡើយ ដោយនាងបានសម្រេចចិត្តផ្អាកពីសិល្បះមួយរយះ ដោយសម្លឹងមើលការសម្តែងនៅក្នុងក្រៅស្រុកជំនួសវិញនោះ។
នាងនិយាយថា ការប្រឡូកក្នុងសិល្បះរបស់នាងជាង១០ឆ្នាំមកនេះគឺហាក់ដូចជាគ្រប់គ្រាន់ហើយសម្រាប់នាង ហេតុនេះការបោះបង់ចោលសិល្បះរបស់នាងគឺមិនមានការសោកស្តាយឡើយ ហើយនាងមិនបានគិតពីការបាត់បង់ប្រជាប្រិយភាពនៅក្នុងស្រុកដែរ ដោយសារតែនាងមានការងារមួយចំនួនដែលត្រូវធ្វើ ដោយរួមទាំងការងារចេញសម្តែងនៅឯក្រៅប្រទេសនោះផងដែរ។
នាងបញ្ជាក់ថា បើទោះបីជាពេលនេះការងារសម្តែងនៅក្នុងស្រុកនាងបានលុបចោលស្ទើរតែទាំងស្រុកក៍ដោយ តែនាងនៅតែអាចរកចំណូលបានច្រើនពីការទទួលយកការចេញសម្តែងនៅឯក្រៅស្រុកដដែល។ទាំងនេះជាមូលហេតុដែលនាងគិតថា ប្រសិនបើយើងកំពុងតែកាក់កបក្នុងការរកប្រាក់នៅឯក្រៅប្រទេសដូច្នេះនោះ គឺយើងត្រូវតែដកឃ្លាមួយរយះពីការងារនៅក្នុងស្រុកសិន បើទោះបីជាការងារនៅក្នុងស្រុកនៅតែធ្លាក់មកជាបន្តបន្ទាប់ក៍ដោយ។
ទោះជាយ៉ាងណា ស៊ឹម ថៃណា អះអាងថា នាងកំពុងតែសម្លឹងឆ្ពោះទៅរកការសម្តែងនៅឯក្រៅប្រទេសឲ្យបានច្រើនជាងការសម្តែងនៅក្នុងស្រុក មុនពេលដែលនាងអាចនឹងសម្រេចចិត្តវិលមករកការងារនៅក្នុងស្រុកវិញនៅពេលណាវិញនោះ។
គួរំលឹកថា នាង ស៊ឹម ថៃណា បានខកខានមិនបានចេញមុខក្នុងសកម្មភាពសិល្បះនៅក្នុងស្រុក បន្ទាប់ពីនាងបានវិលមកពីការសម្តែងនៅក្នុងដីអាមេរិកវិញ នឹងក្រោយពេលដែលនាងបានវេចបង្វិចដើរចេញពីផលិតកម្មM ទាំងមិនអស់ចិត្តក្រោពេលដែលដែលមានព័ត៌មានលេចលឺថា នាងមានការអន់ចិត្តជាមួយតារាចម្រៀងនៅក្នុងទ្រនំតែមួយនេះ។
គេជឿថា ការប្រកាសផ្អាកពីសិល្បះមួយរយះរបស់តារាចម្រៀងដើមទ្រូងស៊ិចស៊ីរូបនេះ គឺអាច ដើម្បីឲ្យមានការចាប់អារម្មណ៍ពីសំណាក់ក្រុមផលិតករ ដែលមើលរំលងចំពោះនាងច្រើនជាងបន្ទាប់ពីនាងនៅតែមិនអាចរកទ្រនំណាមួយឈរជើងឲ្យបានរឹងមាំនោះ។ អញ្ចឹងហើយ ទើបគេជឿថាចង់មិនចង់តារាចម្រៀងរូបនេះត្រូវតែបង្ខំចិត្តប្រកាសដកខ្លួនមួយរយៈ ទើបសម្រេចចិត្តហក់ចូលមកវិញ ដើម្បីកុំឲ្យគេរិះគន់ថា ស្ដោះហើយលេបវិញនោះ៕ ស.រ
