ឌួង ហ្សូរីដា ត្រៀម ៥.០០០ ដុល្លារ ដើម្បីបញ្ចាប់តឿងក្តីក្នុងតុលាការ
សារព័ត៌មាន Cambodia News/
ភ្នំ ពេញ(៥ កុម្ភៈ ២០១៤) ៖ នៅថ្ងៃទី៦ ខែកុម្ភៈ ឆ្នាំ២០១៤ ស្អែកនេះ សាលាដំបូងរាជធានីភ្នំពេញ នឹងប្រកាសសាលក្រម លើបណ្តឹង ប្តឹងពិធីការិនី នាង ឌួង ហ្សូរីដា ពីបទបរិហាកេរ្តិ៍ ជាមួយគ្នានោះ តារាសម្តែង នាង ឌួង ហ្សូរីដា ក៏បានប្រកាសឲ្យដឹងផងដែរថា នាងបានត្រៀមថវិការួចជាស្រេច ចំនួន ៥.០០០ ដុល្លារ ដើម្បីបង់បញ្ចប់រឿង ក្នុងករណីតុលាការ សម្រេចឲ្យនាងចាញ់ក្តី។
តាមរយៈ សារបង្ហោះ នៅលើបណ្តាញទំនាក់ទំនងសង្គម (Facebook) របស់ខ្លួន នាង ឌួង ហ្សូរីដា បានបញ្ជាក់ថា “ វាមិនមានជារឿងក្តីចាប់ចងទេ ចាញ់ឬឈ្នះ វាមិនសំខាន់ ឬបារម្ភនោះឡើយ ព្រោះ យ៉ាងច្រើនបង់លុយ ៥.០០០ ដុល្លារ តាមគេទាមទារ វាតិចជាងការចំណាយ សម្រាប់អ្នកបង្ករឿងនេះ ព្រោះកម្មកំពុងតែតាមហៅបុគ្គល ដែលធ្លាប់ធ្វើនោះ បណ្តើរៗហើយ ។
សារនៅក្នុង (Facebook) បានបន្ថែមថា ក្រុមគ្រួសារខ្ញុំ មិនចេះប្រើពាក្យអាក្រក់ ជេរដៀលនរណាឡើយ ។ ទន្ទឹមនោះ សាររបស់នាង ឌួង ហ្សូរីដា ក៏បានបង្ហាញពីការមិនផ្តល់បទសម្ភាសន៍ណាមួយ ដល់អ្នកកាសែត ប្រហែលជិត ២ ឆ្នាំហើយដែរ អំពីរឿងនេះ ដោយប្រគល់ឲ្យមេធាវីរបស់នាង ជាអ្នកដោះស្រាយ ” ។
ទោះបីជាយ៉ាងណា គេមិនទាន់ដឹងទេថា ក្នុងសេចក្តីប្រកាសសាលក្រម របស់សាលាដំបូងរាជធានីភ្នំពេញ នៅថ្ងៃស្អែកនេះ សម្រេចឲ្យខាងណា ជាអ្នកឈ្នះក្តីនៅឡើយទេ ខណៈគូភាគីទាំងសងខាងកំពុងតែរង់ចាំអ៊ុតមើលដូចគ្នា៕
