សាំង ស៊ុំម៉ាចលីដែត កំពុងស្វែករកសិទ្ធរស់នៅអាមេរិកដោយស្របច្បាប់
តារាចម្រៀងដែលមានឈាមជ័រត្រកូលអ្នកសិល្បះល្ខោនបាសាក់ នាង សាំង ស៊ុំម៉ាចលីដែត បាននឹងកំពុងតែស្វះស្វែករកសិទ្ធរស់នៅលើទឹកដីអាមេរិកដោយស្របច្បាប់ បន្ទាប់ពីតារារូបនេះបានរស់នៅទឹកដីមហាអំណាចមួយនេះដោយមិនស្របច្បាប់ ក្រោយពេលដែលនាងមិនបានវិលត្រឡប់មកទឹកដីកំណើតវិញតាមការកំណត់។
តារាចម្រៀងរូបនេះតែងតែត្រូវបានគេអញ្ជើញឱ្យទៅ ធ្វើជាគណៈមេប្រយោគនៅអាមេរិក ១ឆ្នាំម្តង ដើម្បីជ្រើសរើសយកបេក្ខជនមកប្រលងផ្តាច់ព្រ័ត្រនៅក្នុងស្រុកខ្មែរ។
ប៉ុន្តែ ខណៈពេលដែលនាងទៅធ្វើគណៈមេប្រយោគកាលពីឆ្នាំ២០១២នោះ លុះដល់ថ្ងៃកំណត់វិលមកស្រុកខ្មែរវិញ គេមិនបានឃើញនាងវិលមកវិញនោះឡើយ ដោយនាងបានរត់គេចនៅទីនោះដើម្បីស្វែករកសិទ្ធបានរស់នៅស្របច្បាប់នៅក្នុងទឹកដីដ៍ធំទូលាយមួយនេះ។
យោងតាមប្រភពពីអ្នកនៅក្នុងចង្កោមសិល្បះដូចគ្នាបានបង្ហើបឲ្យដឹងថា តារាចម្រៀងដែលជាចៅបង្ហើតរបស់លោកយាយចេក ម៉ាច តួឯកល្ខោនដ៏ល្បីល្បាញរូបនេះបាននឹងកំពុងរស់នៅសហរដ្ឋអាមេរិកដោយមិនស្របច្បាប់ បន្ទាប់ពីនាងបានរត់គេចខ្លួនមិនព្រមត្រឡប់មកទឹកដីកំណើតវិញ។ ប្រភពដដែលក៏បានបង្ហើបឲ្យដឹងទៀតថា មូលហេតុដែលនាងមិនព្រមវិលមកវិញនេះដោយសារតែនាងមានបំណងចង់រស់នៅទីនោះ ដោយនាងមិនចង់មករស់នៅស្រុកខ្មែរវិញឡើយ បន្ទាប់ពីមានពាក្យចចាមអារាមថា នាងកំពុងតែត្រូវបានបុរសអ្នកមានស្តុកម្នាក់ដែលមានប្រពន្ធកូនរួចហើយនោះតាមនាងកៀកស្អិតនោះ។
ដោយឡែកប្រភពចុងក្រោយនេះក៍បានទម្លាយឲ្យដឹងបន្ថែមទៀតថា ដើម្បីបានរស់នៅស្របនៅអាមេរិកនោះតារាចម្រៀងដែលមានឈាមជ័រជាអ្នកសិល្បះរូបនេះបានសម្រេចចិត្តភ្ជាប់ពាក្យជាមួយបុរសអានិកជនខ្មែររស់នៅទីនោះ។
ប្រភពដដែលបន្តថា សុម៉ាចលីដែត បានមានទំនាក់ទំនងស្នេហាជាមួយប្រុសអាណិកជនខ្មែរ នៅអាមេរិកនោះ ចាប់តាំងតែពីនាងបានហោះហើរទៅដល់ទីនោះលើកទី១មកម៉្លេះ។ចំណេកបុរសដែលបានភ្ជាប់ពាក្យជាមួយនាងនោះគឺជាអ្នកជំនួញ ហើយពេលនេះរង់ចាំតែថ្ងៃរៀបការប៉ុណ្ណោះ។
គេជឿថា ប្រសិនបើចំណងស្នេហ៍ឆ្លងសមុទ្ររបស់នាងមួយនេះអាចឈានដល់មង្គលការពិតប្រាកដមែននោះ គឺជាជោគជ័យសម្រាប់រូបនាងក្នុងការស្វែងរកសិទ្ធរស់នៅដោយស្របច្បាប់នៅទីនោះ។
ទោះជាយ៉ាងណាជុំវិញការលើកឡើងទាំងអស់នេះភ្នំពេញថ្មីមិនអាចស្វែងរកការបកស្រាយពីក្រុមគ្រួសាររបស់នាងសាំង ស៊ុំម៉ាចលីដែត បានឡើយ ដោយសារតែដោយសារទូរស័ព្ទមិនអាចទាក់ទងបាន។
គួបញ្ជាក់ថា ស៊ុំ សុម៉ាចលីដែត គឺអតីតជ័យលាភីលេខ១ ចម្រៀងខ្មែរសកល កាលពីឆ្នាំ២០១០។នាងបានបោះជំហានចូលប្រឡូកវិស័យសិល្បៈចម្រៀងពេញទំហឹង បន្ទាប់ពីនាងបានប្រលជាប់ទទួលបានជ័យលាភីនេះ ។ នាងត្រូវបានគេ ចាត់ទុកថា ជាតារាចម្រៀងស្រករក្រោយ ប៉ុន្តែ នាងមានទឹកដមសំឡេងខ្ពស់គ្រលួចពីធម្មជាតិ ហើយស៊ីតែបទចម្រៀងពីដើមៗ ដោយ នាងបានធ្វើសំឡេងលើកដាក់ថ្នាក់ថ្នមតាមរៀមច្បងរស់ សេរីសុទ្ធា បានល្អ រហូតធ្វើឱ្យទស្សនិកជនមានការកោតសរសើរ។
តារាចម្រៀងស្រីវ័យ២០ឆ្នាំ ចៅលោកយាយចេក ម៉ាច អតីតសិល្បការិនីល្ខោនបាសាក់ដ៏ល្បីដែលទទួលមរណភាពទៅហើយ រូបនេះក៍ធ្លាប់មានកិត្តិយសជាប់ចំណាត់ថ្នាក់លេខ២ផ្នែកចម្រៀងមហោរី ក្នុងកម្មវិធីមរតកវប្បធម៌រៀបចំឡើងដោយស្ថានីយទូរទស្សន៍បាយ័នផងដែរ៕ ស.រ
