ការចាប់ផ្តើមដង្ហែសាកល្បង ព្រះបរមសព ព្រះបរមរតនកោដ្ឋជាលើកទី២
ភ្នំពេញ៖ នៅព្រឹកថ្ងៃទី២៦ មករា ២០១៣នេះ ការសាកល្បង ដង្ហែព្រះបរមសព ព្រះបរមរតនកោដ្ឋ បានចាប់ផ្តើម ធ្វើឡើង ជាលើកទី២ នេះ ដោយមានការ ចូលរួម ពីសំណាក់ ថ្នាក់ដឹកនាំជាន់ខ្ពស់ នៃរាជរដ្ឋាភិបាល និងថ្នាក់ដឹកនាំ ជាន់ខ្ពស់ ក្នុងជួរកម្លាំង ប្រដាប់អាវុធ ព្រមទាំងមាន ការចូលរួម ពីសំណាក់ប្រជាពលរដ្ឋ លោកគ្រូ អ្នកគ្រូ សិស្សានុសិស្ស តាជី យាយជីជាច្រើននាក់។
ក្បួនដង្ហែ បានចាប់ផ្តើមធ្វើឡើង ដោយចេញពីមុខព្រះ បរមរាជវាំង តាមបណ្តោយ ផ្លូវព្រះស៊ីសុវត្ថិ ឆ្ពោះមករមនីយដ្ឋាន វត្តភ្នំ រួចបន្តទៅ តាមផ្លូវព្រះនរោត្តម ហើយពេលទៅ ដល់វិមានឯករាជ្រ បត់តាមផ្លូវព្រះស៊ីហនុ ហើយបត់តាម ផ្លូវសុធារស ឆ្ពោះទៅវាលព្រះមេរុ តែម្តង ទីកន្លែង ថ្វាយព្រះភ្លើង ដល់ព្រះបរមសព ព្រះបរមរតនកោដ្ឋ។
ជាមួយគ្នានេះ កម្លាំងសមត្ថកិច្ច ជាច្រើននាក់ រួមមាន នគរបាល អាវុធហត្ថ យោធា កងអង្គរក្ស ត្រូវបានដាក់ពង្រាយ នៅតាមផ្លូវ ដែលក្បូនដង្ហែឆ្លងកាត់ និងគ្រប់គោលដៅ ដើម្បីរក្សាសន្តិសុខ ដល់ក្បួន ដង្ហែទាំងមូល។
សូមបញ្ជាក់ថា នេះជាការសាកល្បង ដង្ហែព្រះបរមសព ព្រះរបមរតនកោដ្ឋ ដែលបានធ្វើឡើង ជាលើកទី២ ពេលដែលការដង្ហែជាផ្លូវការ នឹងចាប់ផ្តើមធ្វើឡើង នាថ្ងៃទី១ ខែកុម្ភះ ឆ្នាំ២០១៣ និងពិធីថ្វាយព្រះភ្លើង នៅថ្ងៃទី៤ ខែកុម្ភះ៕
