នៅថ្ងៃ ១៨មករា មនុស្ស ៧នាក់ស្លាប់ និង ២៥នាក់របួសដោយសារគ្រោះថ្នាក់ចរាចរណ៍
ភ្នំពេញ ៖ កាលពីថ្ងៃទី១៨ មករា ២០១៣ នាយកដ្ឋានសណ្ឋាប់ធ្នាប់ នៃអគ្គស្នងការដ្ឋាននគរបាលជាតិ បានប្រកាសថា គ្រោះថ្នាក់ចរាចរណ៍ នៅទូទាំងប្រទេស ១៣លើក បណ្តាលឲ្យមនុស្សស្លាប់ ៧នាក់ របួសធ្ងន់ ១២នាក់ និងបង្កឲ្យខូចខាត យានយន្តសរុប ២១គ្រឿង ក្នុងនោះម៉ូតូ ១១គ្រឿង រថយន្តធុនតូច ៩គ្រឿង និងយានផ្សេងៗ ១គ្រឿង។
របាយការណ៍បន្តទៀតថា មូលហេតុដែលបណ្តាលឲ្យមានគ្រោះថ្នាក់ គឺបណ្តាលមកពីបើកបរល្មើសល្បឿនមាន ៧លើក មិនប្រកាន់ស្តាំ ២លើក ប្រជែងគ្រោះថ្នាក់ ១លើក ស្រវឹង ២លើក ក្នុងនោះគ្រោះថ្នាក់ជិះម៉ូតូមិនពាក់មួកសុវត្ថិភាព ៨នាក់ (យប់ ៦លើក)។
ចំពោះរថយន្ត ដែលទទួលរងការផាកពិន័យនៅអង្គភាព នៅថ្ងៃទី១៨ ខែមករា ឆ្នាំ២០១៣ មានចំនួន ១២៣គ្រឿង គឺរថយន្តទេសចរណ៍ ៤២គ្រឿង រថយន្តដឹកអ្នកដំណើរធុនតូច ៤៤គ្រឿង រថយន្តដឹកទំនិញធុនធំ ៤៧គ្រឿង ។ រថយន្តទាំងអស់ខាងលើបានបង់ប្រាក់ពិន័យរួចរាល់ នៅអធិការដ្ឋាននគរបាល ស្រុក/ខណ្ឌ ៥១គ្រឿង នៅស្នងការដ្ឋាននគរបាល រាជធានី/ខេត្ត ៤១គ្រឿង និងនៅនាយកដ្ឋានសណ្តាប់ធ្នាប់ ៣១គ្រឿង។
របាយការណ៍ប៉ូលិស បានឲ្យដឹងថា គ្រោះថ្នាក់ចរាចរណ៍នៅទូទាំងប្រទេស ក្នុងឆ្នាំ២០១២ មានចំនួន ៤.៣០៥ ករណី ធ្វើឲ្យមនុស្សស្លាប់ចំនួន ១.៨៩៤ នាក់ របួសធ្ងន់ ៤.៣៨៨ នាក់ និងរបួសស្រាល ៣.០៧៩ នាក់។ គ្រោះថ្នាក់នោះ បណ្តាលឲ្យខូចខាតម៉ូតូ ៤.៤០៦ គ្រឿង រថយន្តធុនតូច ១.៦៦៧ គ្រឿង និងរថយន្តធុនធំ ៥៣៩ គ្រឿង។
របាយការណ៍ ក៏បានបន្តឲ្យដឹងទៀតថា ចំនួនគ្រោះថ្នាក់ចរាចរណ៍ នៅឆ្នាំ២០១២ បើធៀបនឹងឆ្នាំ២០១១ មានការថយចុះ ៧៩១ ករណី ស្មើនឹង ១៦ ភាគរយ។ ចំណែកជនរងគ្រោះដល់បាត់បង់ជីវិត បានថយចុះម្នាក់។ ជនរងគ្រោះរបួសធ្ងន់ ថយចុះ ៥៦០ នាក់ ស្មើ ១១ ភាគរយ របួសស្រាលថយចុះ៧០៧នាក់ ស្មើនឹង ១៩ ភាគរយ។ ការខូចខាតម៉ូតូ ថយចុះ ៧៦២ គ្រឿង ស្មើនឹង ១៥ ភាគរយ ខូចខាតរថយន្តថយចុះ ១០០ គ្រឿង ស្មើនឹង ៦ ភាគរយ ខូចខាតរថយន្តធុនធំ ថយចុះ ៤៧ គ្រឿង ស្មើនឹង ៨ ភាគរយ៕
