បើករថយន្តកាត់ទ្រូងពុះ ចែកផ្លូវ វ៉ាក់អឺនឹងរថយន្តកុងតឺន័រជ្រុលទៅបុកទ្វារដែកផ្ទះ លក់ម៉ាញ៉េទូរទស្សន៍
ភ្នំពេញ៖ កាលពីវេលាម៉ោង១និង៤៥នាទីរំលងអធ្រាត្រឈាន ចូលថ្ងៃទី១៤ មករា រថយន្តមួយគ្រឿងជិះខាងឆ្វេងដៃក្នុងទ្រូងពុះចែកផ្លូវរួចបានបើកកាត់ទ្រូងពុះ ចែកផ្លូវនោះដើម្បីឆ្លងទៅខាងស្តាំដៃវិញវ៉ាក់អឺនឹងរថយន្តកុងតឺន័រ ជ្រុលចង្កូតទៅបុកទ្វារដែកផ្ទះ លក់ម៉ាញ៉េទូរទស្សន៍បែកប្រអប់ទ្វារនិងវៀចទ្វារដែក ស្ថិតនៅតាមផ្លូវជាតិលេខ១ ផ្ទះលេខ១៥ លក់ម៉ាញ៉េនិងទូរទស្សន៍ នៅផ្សារច្បារ អំពៅ សង្កាត់ច្បារអំពៅទី២ ខណ្ឌមានជ័យ ។
ប្រភព័ត៌មានបានឲ្យដឹងថា រថយន្តហ្វត ពណ៌ខ្មៅ ជិះគ្នា៤នាក់ បើកតាមផ្លូវជាតិលេខ១ ពីកើត ទៅលិច ប៉ុន្តែបើកបញ្ច្រាសខាងឆ្វេងដៃក្នុងទ្រូងពុះចែកផ្លូវដែលមាន កម្ពស់ទាបជាងទ្រូងពុះចែកតាមវិថីនានា ទើបរថយន្តនោះបានបើកឆ្លងទ្រូងពុះចែកផ្លូវទៅខាងស្តាំដៃវិញ ស្រាប់តែវាក់អឺនឹងរថយន្តកុងតឺន័រ ធ្វើឲ្យរថយន្តបួងចង្កូតជ្រុលទៅបុកបែកប្រអប់ទ្វារ និងវៀចទ្វារដែក ផ្ទះលក់ម៉ាញ៉េទូរទស្សន៍។
ក្រោយកើតហេតុរថយន្តបង្កព្យាយាមបើកថយក្រោយរត់គេចទាំងរថយន្តបែកកង់ក្រោយ ចំហៀងខាងឆ្វេងទៅដល់មុខគ្លីនិកបញ្ញាសក្តិ ត្រង់ចំណុចផ្លូវលេខ២៧១កែង៣៧១ ក្នុងសង្កាត់ផ្សារដើមថ្កូវ ខណ្ឌចំការមន ត្រូវសមត្ថកិច្ចឃាត់បានបញ្ជូនទៅខណ្ឌមានជ័យដើម្បីធ្វើការដោះស្រាយ៕
