បន្លំលួចទូរស័ព្ទដៃស៊េរីទំនើបពីរគ្រឿងម្ចាស់ទាន់ក្របួចជាប់
ភ្នំពេញ ៖ កាលពីវេលាម៉ោង១៨ ថ្ងៃទី៩ ខែមករា ជនយុវជនម្នាក់ត្រូវបានជនរងគ្រោះចាប់ប្រគល់ជូនសមត្ថកិច្ច បន្ទាប់ពីយុវជនរូបនេះបានធ្វើសកម្មភាពបន្លំលួចទូរស័ព្ទដៃស៊េរី ទំនើបចំនួនពីរ គ្រឿង ម៉ាក iphone 4s និងម៉ាក iphone 5 មិនបានសម្រេច នៅចំណុចមុខហាងលក់ទូរស័ព្ទ ដែលមានទីតាំងលេខ ៣១Eo ផ្លូវ លេខ១៤២ ភូមិទី៤ សង្កាត់ផ្សារថ្មីទី១ ខណ្ឌដូនពេញ។
មុនពេលកើតហេតុជនរងគ្រោះនិងប្រពន្ធកំពុងលក់ទូរស័ព្ទនៅចំណុចផ្ទះកើតហេតុ ស្រាប់តែមានក្មេងទំនើងខាងលើ បានចុះពីលើម៉ូតូឌុបយកទូរស័ព្ទម៉ាក ណូគារ ៥៨០០ ទៅបញ្ចាំ ក្នុងតំលៃ៣០ដុល្លារ ។ ដោយជនរងគ្រោះជាប់រវល់និយាយជាមួយភ្ញៀវផ្សេង ទៀត ឆ្លៀតពេលនោះជនសង្ស័យបានបន្លំលួចទូរស័ព្ទដៃស៊េរីទំនើបចំនួន២ គ្រឿង នៅក្នុងទូតាំង គឺម៉ាក iphone 4s និងម៉ាក iphone 5 កាន់នៅក្នុងដៃ ហើយដើរចេញមកក្រៅបំណងគេចខ្លួន ខណៈនោះត្រូវជនរងគ្រោះក្រឡេកឃើញទាន់ ក៏នាំគ្នារត់ចេញចាប់ប្រគល់ឲ្យសមត្ថកិច្ច ចាត់ការតាមច្បាប់។
សមត្ថកិច្ច ប្រាប់ថា ជនសង្ស័យមានឈ្មោះ រុន រ៉េត ភេទប្រុស ៣០ឆ្នាំ មុខរបរ និងទីលំនៅមិនពិតប្រាកដ ត្រូវបានឃាត់ខ្លួន។ ចំណែកជនរងគ្រោះនៅក្នុងករណីនេះឈ្មោះ ញឹម សុផល ភេទប្រុស អាយុ៦២ឆ្នាំ ជាឧកញ៉ា មុខរបរអាជីវករ ស្នាក់នៅផ្ទះលេខ៣១Eo ផ្លូវលេខ១៤២ ភូមិទី៤ សង្កាត់ផ្សារថ្មីទី១ ខណ្ឌដូនពេញ រាជធានីភ្នំពេញ។
នៅ ចំពោះមុខសមត្ថកិច្ចជនសង្ស័យ រុន រ៉េត ឆ្លើយសារភាពថា ខ្លួនគេពិតជាបានធ្វើសកម្មភាពលួចទូរស័ព្ទដៃស៊េរីទំនើបចំនួនពីរ គ្រឿង របស់ជនរងគ្រោះប្រាកដមែន បច្ចុប្បន្ន ជនសង្ស័យ រុន រ៉េត សមត្ថកិច្ចកំពុងឃាត់ខ្លួនបណ្ដោះអាសន្ននៅអធិការដ្ឋាននគរបាលខណ្ឌដូនពេញ ធ្វើការសួរនាំបន្ត ដើម្បីកសាងសំណុំរឿងបញ្ជូនទៅ តុលាការរាជធានីភ្នំពេញ ផ្ដន្ទាទោសតាមផ្លូវច្បាប់៕
ដោយ៖ ហេង នាង
