គណបក្សប្រជាជន បង្ហាញកម្មវិធីនយោបាយនៅថ្ងៃដំបូងនៃយុទ្ធនាការឃោសនា
Cambodia News
ភ្នំពេញ៖ នាព្រឹកថ្ងៃទី២៧ មិថុនា នេះ គណបក្សប្រជាជនកម្ពុជា បង្ហាញកម្មវិធីនយោបាយរបស់ខ្លួននៅថ្ងៃដំបូងនៃយុទ្ធនាការរកសំ ទ្បេងឆ្នោត ទៅកាន់អ្នកគាំទ្រគណបក្សប្រមាណជាង១ម៉ឺននាក់ នៅមជ្ឈមណ្ឌលកោះពេជ្រ ដើម្បីឲ្យម្ចាស់ឆ្នោត បោះឆ្នោតឲ្យគណបក្សរបស់ខ្លួននៅថ្ងៃទី២៨ ខែកក្កដា ឆ្នាំ២០១៣ ខាងមុខ។
ក្នុងវេទិកាខួបលើកទី៦២ ថ្ងៃបង្កើតគណបក្សប្រជាជនកម្ពុជា និងពិធីបើកយុទ្ធនាការឃោសនាបោះឆ្នោតជ្រើសតាំងតំណាងរាស្ត្រនីតិកាល ទី៥ នាព្រឹកថ្ងៃទី២៧ ខែមិថុនា ឆ្នាំ២០១៣នេះ លោក ហេង សំរិន ប្រធានកិត្តិយសគណបក្សប្រជាជនកម្ពុជា បានថ្លែងថា គោលនយោបាយរបស់គណបក្សប្រជាជនកម្ពុជា នឹងធ្វើការបម្រើប្រជាពលរដ្ឋ អភិវឌ្ឍន៍ប្រទេសកម្ពុជាឲ្យមានការរីកចំរើន ជួយការពារបូរណៈភាពទឹកដីនៃព្រះរាជាណាចក្រកម្ពុជា និងដោះស្រាយបញ្ហាព្រំដែនជាមួយប្រទេសជិតខាង ការពារសន្តិសុខ សណ្តាប់ធ្នាប់សាធារណៈ នឹងជួយកាត់បន្ថយភាពក្រីក្រនៅកម្ពុជា។
បន្ទាប់ពីធ្វើការថ្លែងគោលនយោបាយរបស់បក្សដោយ លោក ហេង សំរិន ប្រជាពលរដ្ឋ ដែលជាសមាជិកបានមកជួបជុំគ្នា នៅកោះពេជ្រ និងមន្ត្រីនៅតាមខ័ណ្ឌ សង្កាត់ផ្សេងៗ បានឲ្យប្រជាពលរដ្ឋ ដែលមកពីទីតាំងផ្សេងគ្នានោះ ជិះលើរថយន្ត ឡាន ម៉ូតូ ដើម្បីធ្វើការដង្ហែក្បួនទៅតាមទិសដៅរៀងៗខ្លួន ដែលគណបក្សបានកំណត់។
យុទ្ធនាការរកសន្លឹកឆ្នោតរបស់គណបក្សនយោបាយ ចាប់ផ្តើមពីថ្ងៃទី២៧ ខែមិថុនា ដល់ថ្ងៃទី២៦ ខែកក្កដា ឆ្នាំ២០១៣ ហើយគណបក្សនយោបាយចំនួន៨ នឹងប្រកួតប្រជែងការបោះឆ្នោតជាតិខាងមុខ៕
