យុវជន២នាក់រងរបួសធ្ងន់ខណៈជិះម៉ូតូទៅកៀរជាមួយរ៉ឺម៉ក
ភ្នំពេញ ៖ កាលពីវេលាម៉ោង១០ និង៥០នាទីយប់ថ្ងៃទី១៧ ធ្នូ យុវជន ២នាក់ រងរបួសធ្ងន់ ខណៈពេលជិះម៉ូតូលឿនពេក ទៅកៀរជាមួយរ៉ឺម៉កសណ្តោងកន្ទុយ កំពុងបត់ឆ្វេង បណ្តាលឲ្យដួលអូសជាង ១០ម៉ែត្រ ស្ថិតនៅមុខព្រះបរមរាជវាំង តាមវិថីព្រះស៊ីសុវត្ថិ ក្នុងសង្កាត់ចតុមុខ ខណ្ឌដូនពេញ។
ប្រភពព័ត៌មានបានឲ្យដឹងថា រ៉ឺម៉កសណ្តោងកន្ទុយ មានដឹកមនុស្សជិះពីក្រោយ ៤ទៅ ៥នាក់ បើកមកពីខេត្តកំពង់ស្ពឺក្នុងគោលបំណងទៅមើលក្មួយឈឺសម្រាកព្យាបាល នៅមន្ទីរពេទ្យគន្ធបុប្ជា ។ លុះពេលមកភ្នំពេញ ហើយបានឈៀងទៅអង្គុយលេង នៅមុខព្រះបរមរាជវាំង ទើបបើករ៉ឺម៉កសណ្តោងនោះ ក្នុងទិសដៅពីត្បូងទៅជើងហើយបត់ឆ្វេងចូល ទៅរកកន្លែងអង្គុយលេង ស្រាប់តែម៉ូតូវ៉េវអាល់ហ្វា ពណ៌ខ្មៅ ជិះគ្នា ២នាក់ ជិះលឿនពេក ចាប់ហ្រ្វាំងមិនទាន់ ជ្រុលទៅកៀររ៉ឺម៉កនោះដួលអូសជាង ១០ម៉ែត្រ បណ្តាលឲ្យរងរបួស ធ្ងន់ទាំង២នាក់។
ក្រោយពេលកើតហេតុ ជនរងគ្រោះទាំងពីរនាក់ ត្រូវបានបញ្ជូនទៅព្យាបាលនៅមន្ទីរពេទ្យ កាល់ម៉ែត ។ រ៉ឺម៉កសណ្តោងកន្ទុយនឹងម៉ូតូ ត្រូវសមត្ថកិច្ចធ្វើការវាស់វែងយកទៅរក្សាទុក នៅខណ្ឌដូនពេញ រង់ចាំធ្វើការដោះស្រាយតាមច្បាប់ ៕
ដោយ៖ ហេង នាង
