សម្តេចតេជោ ហ៊ុន សែន បញ្ជាឲ្យយកសត្វក្ងោកដែលចាប់ជូនម្ចាស់វិញដល់ផ្ទះវិញ

សារព័ត៌មាន​ Cambodia News/

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានផ្ញើសារជាសំឡេងជូន រដ្ឋមន្រ្តីក្រសួងកសិកម្ម រុក្ខាប្រមាញ់ និង​នេសាទ និងរដ្ឋមន្រ្តីស្តីទី ក៏ដូចជាមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលទទួលខុសត្រូវខាងសត្វ ដោយ​​​បញ្ជា​ឲ្យ​យក​សត្វក្ងោកជូនប្រជាពលរដ្ឋដល់ផ្ទះនៅក្នុងថ្ងៃទី២៨ ខែកុម្ភៈ ឆ្នាំ២០២៣នេះ។

សម្តេចតេជោ មានប្រសាសន៍បញ្ជាក់ថា សម្តេចមិនយល់ស្របជាមួយទង្វើបែបនេះទេ គួរ​តែ​លើក​ទឹក​ចិត្ត​ឲ្យ​ប្រជា​ជន​ចិញ្ចឹម​សត្វ​ដែលជិតផុតពូជ ជាជាងចាប់យកសត្វដែលប្រជាជនខំចិញ្ចឹមយកមកទុក ដែលមិនយូរប៉ុន្មានសត្វនេះនឹងស្លាប់ ប្រសិន​បើ​ខ្វះ​ការ​ថែទាំ និងការយកចិត្តទុកដាក់។

សម្តេចថ្លែងបន្តថា គ្មានហេតុផលណាមួយដែលត្រូវចាប់យកក្ងោកដែលប្រជាជនចិញ្ចឹម យក​មក​ទុក​កន្លែង​ចិញ្ចឹម​សត្វ​ហើយ​ចាត់​ទុក​ថា ជាអំពើខុសច្បាប់។ ក្នុងករណីដែលច្បាប់បានចែង ស្នើឲ្យធ្វើការជាបន្ទាន់ ដើម្បីធ្វើវិសោធនកម្មច្បាប់ លប់​ចោល​នូវ​ក​ឋា​ខណ្ឌ​ណា​ទាក់ទិនជាមួយនឹងការចាប់សត្វចិញ្ចឹមរបស់ប្រជាពលរដ្ឋ និងត្រូវតែគួរលើកទឹកចិត្តឲ្យប្រជាជនចិញ្ចឹម ជាការដែលធ្វើ​ទៅ​ដល់​ចលនា​នៃការចិញ្ចឹមសត្វរបស់ប្រជាពលរដ្ឋ។

បន្ទាប់ពីទទួលបាននូវបទបញ្ជាពី សម្តេចតេជោ ហ៊ុន សែន នៅព្រឹកថ្ងៃទី២៨ ខែកុម្ភៈ ឆ្នាំ២០២៣ នេះដែរ មន្ត្រីរដ្ឋបាលព្រៃឈើ ក៏បានចាប់សត្វក្ងោកទាំង២០ក្បាលពីសួនសត្វភ្នំតាម៉ៅ ស្ថិតក្នុងស្រុកបាទី ខេត្តតាកែវ ទៅ​ប្រគល់​ជូន​ប្រជាពល​រដ្ឋ​ដែល​ជា​ម្ចាស់​ដើម​វិញ​នៅឯ​ស្រុកបរិបូណ៌ ខេត្តកំពង់ឆ្នាំង។

សូមបញ្ជាក់ថា កាលពីថ្ងៃទី១៦ ខែកុម្ភៈ ឆ្នាំ២០២៣ ក្រុមអន្តរាគមន៍បង្ក្រាបបទល្មើសសត្វព្រៃចល័តរដ្ឋបាលព្រៃឈើ នៃ​ក្រសួង​កសិកម្ម​ រុក្ខាប្រមាញ់ និងនេសាទ បានធ្វើការចាប់ឃាត់សត្វក្ងោកចំនួន៦ក្បាល ពីប្រជាពលរដ្ឋឈ្មោះ យឹម សំអឿន ភេទប្រុស អាយុ៣៤ឆ្នាំ រស់នៅភូមិសន្លង់ ឃុំត្រពាំងចាន់ ស្រុកបរិបូណ៌ ខេត្តកំពង់ឆ្នាំង និងត្រូវបាន ឯកឧត្តមបណ្ឌិត កែវ អូម៉ាលីស្ស ប្រតិភូរាជរដ្ឋាភិបាលទទួលបន្ទុកជា ប្រធានរដ្ឋបាលព្រៃឈើ ចេញលិខិតឲ្យចូលខ្លួនដោះស្រាយបន្តនីតិវិធីបញ្ចប់សំណុំរឿង នៅថ្ងៃទី០៣ ខែមីនា ឆ្នាំ២០២៣ នៅខណ្ឌរដ្ឋបាលព្រៃឈើកំពង់ឆ្នាំង៕