សម្តេចតេជោអំពាវនាវកុំឲ្យមានការចោទប្រកាន់ ឬលាបពណ៌គ្នារវាងអ្នកទៅ និងមិនទៅបោះឆ្នោត
សារព័ត៌មាន Cambodia News/
រាជធានីភ្នំពេញ (០២ សីហា ២០១៨) ៖ ក្នុងឱកាសជួបសំណេះសំណាលជា មួយបងប្អូនកម្មករនិយោជិត ជាង ១ ម៉ឺននាក់នៅថ្ងៃទី ២ ខែ សីហា នេះនៅតំបន់ផ្លូវវ៉េងស្រេង ដែលមកពីរោងចក្រ សហគ្រាសនានានៅក្នុងសង្កាត់ចោមចៅខណ្ឌពោធិ៍សែនជ័យ សម្តេច ហ៊ុន សែន ប្រធានគណបក្សប្រជាជនកម្ពុជាបានថ្លែងអំណរគុណចំពោះ ប្រជាជនកម្ពុជាទូទាំង ប្រទេស និងកម្មករ កម្មការិនីដែលបាន ចូលរួមទៅបោះឆ្នោតចូលរួមពង្រឹងលទ្ធិប្រជាធិបតេយ្យ។
សម្តេច បានអំពាវនាវកុំឲ្យមានការចោទប្រកាន់ ឬលាប ពណ៌គ្នា រវាងអ្នកទៅ និងមិនទៅបោះឆ្នោត និងបានថ្លែងអំណរគុណចំពោះការអញ្ជើញទៅបោះឆ្នោតរបស់ ប្រជាជនបាន ធ្វើឲ្យយុទ្ធនាការដេកផ្ទះឈ្នះស្អាតបរាជ័យ។ សម្តេចបន្តថា យុទ្ធនាការនេះជាការ ល្ងង់មួយ ដែលបង្ហាញឲ្យឃើញថា កុំថាឡើយដឹកនាំប្រទេស សូម្បីដឹកនាំក្រុមហ៊ុន ឬគ្រួសារមួយ ក៏មិនអាចដឹកនាំបានដែរ។
សម្តេច ហ៊ុន សែន អះអាងថា ចំនួនអ្នកទៅបោះឆ្នោតជាង៨២ភាគរយ គាំទ្រលទ្ធិប្រជាធិបតេយ្យ ចំណែកអ្នកដែលថាមិនទទួលស្គាល់ការបោះឆ្នោតនោះ គឺអ្នកតែងតែមិនទទួលស្គាល់រហូត មកហើយចាប់តាំងពីឆ្នាំ១៩៩៨មក។ សម្តេចបានបន្តថា អ្នកគិតខុសរហូត ដូច្នេះហើយ បានជាអ្នកតែងបរាជ័យ ។
សម្តេចបញ្ជាក់ថា ប្រជាពលរដ្ឋ និងកម្មករកម្មការិនីបានបោះឆ្នោត យ៉ាងច្រើនគឺដោយស្រលាញ់សន្តិភាព ។ ទន្ទឹមនោះសម្តេចក៏ បានបង្ហាញឆន្ទៈក្រោយពេល ជាប់ឆ្នោតថា នឹងដឹកនាំប្រទេសកម្ពុជាប្រកបដោយសន្តិភាព និងការអភិវឌ្ឍ៕
