ពីថ្ងៃនេះទៅ ទូរទស្សន៍ជាតិកម្ពុជានឹងចាប់ផ្ដើមផ្សាយ ២៤ម៉ោង
សារព័ត៌មាន Cambodia News/
ភ្នំពេញ ៖ ទូរទស្សន៍ជាតិកម្ពុជា (ទទក) នឹងធ្វើការចាក់ផ្សាយ ២៤ម៉ោងលើ២៤ម៉ោង ចាប់ពីថ្ងៃទី១ ខែកុម្ភៈ ឆ្នាំ២០១៧នេះ តាមការយោបល់ដ៏វៃឆ្លាត របស់ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា។
យោងតាមគេទំព័រហ្វេសប៊ុក របស់ លោក គឹម គុណវឌ្ឍ អគ្គនាយកទូរទស្សន៍ជាតិកម្ពុជា នៅថ្ងៃទី ៣១ ខែមករា ឆ្នាំ២០១៧ ថាកម្មវិធីផ្សាយ របស់ ទទក ចាប់ ពីថ្ងៃទីពុធ ទី១ ខែកុម្ភៈ ឆ្នាំ២០១៧នេះតទៅ នឹងផ្សាយ២៤ម៉ោងលើ២៤ម៉ោង ទោះជាពុំមានការផលិតកម្មវិធីបន្ថែមថ្មីៗទៀតក៏ដោយ។
លោកបន្តថា “ទទក យើងខ្ញុំបានគោរពតាមប្រសាសន៍ណែនាំ របស់ សម្ដេចតេជោ ហ៊ុន សែន នៅក្នុងពិធីសំណេះសំណាលជាមួយអ្នកការសែត កាលពីថ្ងៃទី១៤ ខែមករា ឆ្នាំ២០១៧”។
សូមបញ្ជាក់ថា កាលពីថ្ងៃទី១៤ ខែមករា ឆ្នាំ២០១៧ ក្នុងពិធីសំណេះសំណាល ជាមួយក្រុមអ្នកកាសែតសម្តេចបានស្នើឲ្យទូរទស្សន៍ជាតិកម្ពុជា ដែលជាទូរទស្សន៍របស់រដ្ឋ ត្រូវផ្សាយកម្មវិធី២៤ម៉ោង ដើម្បីបម្រើទស្សនីយ៍ភាពទស្សនិកជននៅទូទាំងប្រទេស៕
