លោក អូបាម៉ា នៅតែទទូចឲ្យចិនឈប់ទាមទារកាន់កាប់ក្នុងដែនសមុទ្រចិនខាងត្បូង
សារព័ត៌មាន Cambodia News/
អាមេរិក (១៨ វិច្ចិកា ២០១៥) ៖ បន្ទាប់ពីកិច្ចប្រជុំជាមួយប្រធានាធិបតីហ្វីលីពីនលោក បេនីណូ អាគីណូ នៅក្រៅកិច្ចប្រជុំអាស៊ីប៉ាស៊ីហ្វិកក្នុងទីក្រុងម៉ានីលប្រទេសហ្វីលីពីន ប្រធានាធិបតីអាមេរិកលោកបារ៉ាក់ អូបាម៉ាបាននិយាយនៅថ្ងៃទី១៨វិច្ឆិកានេះថា ចិនត្រូវតែបញ្ឈប់ការអះអាងរបស់ខ្លួនចង់កាន់កាប់ដីនៅក្នុងដែនជម្លោះក្នុងសមុទ្រចិនខាងត្បូងទៀតទៅ។
ឆ្លើយតបនឹងបញ្ហានេះ ប្រធានាធីបតីហ្វីលីពីនក៏បានបញ្ជាក់ជំហរយល់ព្រមជាមួយអាមេរិកដែរ ដោយយល់ស្របទៅលើសម្ដីរបស់លោកអូបាម៉ាថា ច្បាប់ទាក់ទងនឹងសេរីភាពក្នុងការរុករកនៅដែនសមុទ្រចិនខាងត្បូង គួរតែត្រូវបានលើកកម្ពស់ ដើម្បីជាសម្អាងមួយសម្រាប់ប្រទេសមានជម្លោះជាមួយចិន ក្រោយពេលចិនថាដែនសមុទ្រចិនខាងត្បូងស្ទើរតែទាំងមូលគឺជាដែនអធិបតេយ្យរបស់គេ។
ជាការកត់សម្គាល់ អាមេរិកតែងតែលូកដៃចូលក្នុងជម្លោះនៅដែនសមុទ្រចិនខាងត្បូង ដែលបច្ចុប្បន្នចិនកំពុងតែតឹងសរសៃកជាមួយហ្វីលីពីននិងវៀតណាម។ អាមេរិកបានសម្រេចជួយវៀតណាម និងហ្វីលីពីនតាមរយៈហេតុផលផ្សេងៗដែលអាមេរិកយល់ថាស្របតាមច្បាប់អន្ដរជាតិ។
ការមើលឃើញពីទិដ្ឋភាពខាងក្រៅអាចបញ្ជាក់បានថា អាមេរិកចង់ទទួលបានផលចំណេញពីវៀតណាមនិងហ្វីលីពីន នៅពេលជួយប្រទេសទាំងពីរទាមទារដែនកម្មសិទ្ធិពីចិន ប៉ុន្ដែទិសដៅពិតប្រាកដរបស់អាមេរិក គេមិនទាន់អាចវាស់ស្ទង់បានថាដើម្បីអ្វីឡើយ៕
