អាមេរិកសម្ញែងយន្ដហោះទម្លាក់គ្រាប់B-52នៅកូរ៉េខាងត្បូង
សារព័ត៌មាន Cambodia News/
អាមេរិក (១១ មករា ២០១៦) ៖ អាមេរិក ក្រោយពេលរិះគន់ដល់កូរ៉េខាងជើងរឿងបាញ់គ្រាប់បែកអ៊ីដ្រូសែនរួចហើយ អាមេរិកបានសម្ញែងបង្ហាញយន្ដហោះទម្លាក់គ្រាប់B-52 ជាយន្ដហោះអាចផ្ទុកអាវុធនុយក្លេអ៊ែរបាន ចេញពីមូលដ្ឋានរបស់ខ្លួននៅកោះGuam។
យន្ដហោះអាមេរិកត្រូវបានគេឃើញវត្ដមានកាលពីថ្ងៃទី១០មករា ដោយហោះក្នុងកម្ពស់ទាបមែនទែនពីលើមូលដ្ឋានទ័ពអាកាសOsan Air Base របស់កូរ៉េខាងត្បូង អមដោយយន្ដហោះចម្បាំងពីរគ្រឿងទៀតគឺ ប្រភេទF-16របស់អាមេរិក និងប្រភេទF-15របស់កូរ៉េខាងត្បូង មុនត្រឡប់ទៅមូលដ្ឋានវិញលើកោះGuam។ នេះបើតាមការបញ្ជាក់ពីកងទ័ពអាមេរិកនៅក្នុងសេចក្ដីថ្លែងការណ៍។
នៅទីក្រុងវ៉ាស៊ីនតោន ប្រធានគ្រប់គ្រងមន្ដ្រីនៅសេតវិមានអាមេរិកលោកDenis McDonough បាននិយាយកាលពីថ្ងៃទី១០មករាថា ការហោះហើរនៅពេលនេះគឺជាការបង្ហាញពីមិត្ដភាពយូរអង្វែងនិងជ្រាលជ្រៅបំផុតរវាងអាមេរិកនិងកូរ៉េខាងត្បូង។ លោកបន្ដថា អាមេរិកនិងបន្ដធ្វើការជាមួយចិន និងរុស្ស៊ី ព្រមទាំងសម្ព័ន្ធមិត្ដផ្សេងទៀតមានជប៉ុននិងកូរ៉េខាងត្បូង ដើម្បីជំរុញឲ្យកូរ៉េខាងជើងប្ដេជ្ញាចិត្ដអនុវត្ដន៍ការកម្ចាត់ចោលអាវុធនុយក្លេអ៊ែររបស់ខ្លួន។
គួរកត់សម្គាល់ដែរថា ឲ្យតែអាមេរិកនិងកូរ៉េខាងត្បូងបង្ហាញទំនាក់ទំនងជិតស្និទ្ធនឹងគ្នាបន្ដិចលើវិស័យយោធា កូរ៉េខាងជើងក៏ប្រតិកម្មភ្លាម ព្រោះគិតថាប្រទេសទាំងពីរកំពុងរៀបផែនការឈ្លានពានកូរ៉េខាងជើង។ កន្លងមក មានការធ្វើសមយុទ្ធរួមគ្នារវាងកូរ៉េខាងត្បូងនិងអាមេរិកជាឧទាហរណ៍ស្រាប់៕