ប្រលងបាក់ឌុប ឆ្នាំនេះ ធ្វើនៅថ្ងៃទី២៤ សីហា មានបេក្ខជន ៨៨.៤៨៨ នាក់
សារព័ត៌មាន Cambodia News/
ភ្នំពេញ (២៥ មិថុនា ២០១៥)៖ នៅថ្ងៃទី២៤ ខែមិថុនា ឆ្នាំ២០១៥ ក្រសួងអប់រំយុវជន និងកីឡា បានប្រកាស ថា ការប្រឡងសញ្ញាបត្រមធ្យមសិក្សាទុតិយកភូមិ ឬការប្រឡងបាក់ឌុប ចំណេះទូទៅ និងបំពេញវិជ្ជា នឹងត្រូវរៀបចំឡើង នៅថ្ងៃទី២៤ ខែសីហា ឆ្នាំ២០១៥។
ការប្រឡងឌុប ដែលត្រូវរឹតបន្តឹងវិន័យគឺមិនខុសពីឆ្នាំមុន នឹងមានបេក្ខជនចូលរួមប្រឡងទូទាំងប្រទេស ចំនួន ៨៨.៤៨៨ នាក់ ដោយមាន ១៤៩ មណ្ឌល ស្មើនឹង ៣.៥៧៦ បន្ទប់។
ក្នុងសេចក្តីប្រកាស ចុះថ្ងៃទី២៤ ខែមិថុនា ឆ្នាំ២០១៥ ក្រសួងអប់រំយុវជន និងកីឡា ក៏បានគូសបញ្ជាក់ថា បេក្ខជនទាំងអស់ ត្រូវគោរពបទប្បញ្ញត្តិនៃការប្រឡង និងហាមដាច់ខាត មិនឲ្យយកឧបករណ៍អេឡិចត្រូនិក ឬប្រ៊ីយ៉ុង ចូលមណ្ឌលប្រឡងឡើយ៕
